वासिङ्टन । मस्कोले युक्रेनविरुद्ध ड्रोनको घातक प्रहार गरेपछि अमेरिकी राष्ट्रपति डोनाल्ड ट्रम्पले आफ्ना रुसी समकक्षी भ्लादिमिर पुटिनको आलोचना गरेका छन् । स्थानीय समयअनुसार आइतबार राति उक्त घटनालाई राष्ट्रपति ट्रम्पले उक्त घटनालाई ‘मूर्खता’ को संज्ञा दिएका छन् ।

रुसले युक्रेनविरुद्ध आइतबार राति गरेको ड्रोन प्रहारबाट कम्तीमा १३ जनाको मृत्यु भएको थियो । ‘रुसका राष्ट्रपति भ्लादिमिर पुटिनसँग मेरो सधैँ राम्रो सम्बन्ध छ, आइतबारको व्यापक आक्रमणले उनलाई केही न केही भएकोजस्तो देखियो । यो बिल्कुल पागलपन हो ।’ ट्रम्पले आफ्नो ट्रुथ सोसल प्लेटफर्ममा गरेको एक पोस्टमा भनेका छन् ।

उनले भने, ‘मैले सधैँ भन्ने गरेको छु पुटिन युक्रेनको एक टुक्रा मात्र होइन, सम्पूर्ण भाग चाहनुहुन्छ । सायद यो सही साबित भइरहेको छ तर यदि उनले त्यसो गरे भने यसले रूसको पतन निम्त्याउँछ।’ पछिल्लो समय दुर्लभ रूपमा पुटिनको आलोचना गर्ने गरेका ट्रम्पको टिप्पणीले मस्कोको आक्रमणले अमेरिकी नेताले किएभसँगको गतिरोधपूर्ण युद्धविराम वार्तामा मस्कोको अडानप्रति बढ्दो निराशा व्यक्त गरेको देखिएको छ ।

यसअघि आइतबार ट्रम्पले युक्रेनमा भएको पछिल्लो आक्रमणबाट आफू ‘खुसी नभएको’ र मस्कोमाथि थप प्रतिबन्ध लगाउनेबारे आफू ‘पूर्णरुपमा’ विचार गरिरहेको बताएका थिए । राष्ट्रपति ट्रम्पले भने, मैले उनलाई लामो समयदेखि चिनेको छु, सधैं उनीसँग घुलमिल भइरहन्छु, तर उनले शहरमा रकेट पठाउँदै छन् र मानिसहरूलाई मारिरहेका छन्, र मलाई यो पटक्कै मन परेको छैन ।

युक्रेनको आपतकालिन सेवाले राजधानी किएभसहित लगातार दोस्रो रात रुसले गरेको हवाई आक्रमणपछि देशमा ‘आतङ्कको वातावरण’ सिर्जना भएको जनाएको छ । रुसको पछिल्लो आक्रमणमा उत्तर–पश्चिमी क्षेत्र झितोमिरमा मारिएकामध्ये तीन जना ८, १२ र १७ वर्षका बालबालिका रहेको अधिकारीहरुले बताएका छन् ।

रूसको पछिल्लो व्यापक आक्रमणपछि युक्रेनका राष्ट्रपति भोलोदिमिर जेलेन्स्कीले सामाजिक सञ्जालमा भनेका छन्, रुसी नेतृत्वमाथि कडा दबाब बिना यो क्रूरता रोक्न सकिंदैन । उनले भने, प्रतिबन्धले पक्कै पनि रूसलाई वार्तामा बस्न मद्दत गर्नेछ । अमेरिका र विश्वका अन्य मुलुकको मौनताले पुटिनलाई प्रोत्साहन मात्र गर्छ ।

आफ्नो सामाजिक सञ्जाल पोस्टमा ट्रम्पले जेलेन्स्कीको पनि आलोचना गरेका छन्, उनको आवेगले उनले देशलाई कुनै फाइदा गर्दैन । उनको मुखबाट निस्कने मलाई यो मन पर्दैन र यो बन्द गर्नु राम्रो हुन्छजस्ता सबै कुराले समस्या निम्त्याउँछ, राष्ट्रपति ट्रम्पले भने ।

यसैबीच, युरोपेली सङ्घका उच्च कूटनीतिज्ञ काजा कल्लासले पनि यो युद्ध रोक्न रुसमाथि कडा भन्दा कडा अन्तर्राष्ट्रिय दबाब दिन आग्रह गरेका छन् । उनले सामाजिक सञ्जालमा लेखेका छन्, गत रातिको आक्रमणले रुसले युक्रेनलाई थप दुःख दिन चाहेको र युक्रेनको विनाशमा झुकेको देखाएको छ ।

प्रतिबन्धको आह्वान 

जर्मनीका विदेशमन्त्री जोहान वाडेफुलले पनि आक्रमणको निन्दा गरेका छन् । पुटिन शान्ति चाहनुहुन्न, उनी युद्ध जारी राख्न चाहहनुहुन्छ तर हामीले उनलाई त्यसो गर्न दिनु हुँदैन, वाडेफुलले भने, ‘यसैकारण हामी युरोपेली स्तरमा थप प्रतिबन्धहरू अनुमोदन गर्नेछौँ ।’ युक्रेनको सेनाले आइतबार ४५ वटा रुसी क्षेप्यास्त्र र २६६ वटा आक्रमणकारी ड्रोन खसालेको जनाएको छ । एएफपी