अस्टिन, (टेक्सस) । टेक्सस राज्यको राजधानीको मुख्य प्रशासकीय तथा संसद भवन (क्यापिटलहिल) मा पहिलोपटक बुद्ध जयन्ती (वेसाक दिवस) आयोजना भएर सम्पन्न भएको छ । बुद्ध धर्मसँग संवन्धित यो पहिलो र भव्य कार्यक्रम भएको आयोजकहरूले जनाएका छन् ।
गत विहीबार मनाइएको यस पर्वका अवसरमा टेक्ससको संसदले बुद्ध जयन्तीलाइ विशेष रूपमा मान्यता समेत प्रदान गरेको छ । नेप्लिज बुद्धिष्ट एसोसिएसन टेक्ससको आयोजना तथा हुओङ दाओ विपस्सना भावना केन्द्र तथा टेक्ससभरिका अन्य बौद्ध समुदायहरूको सहकार्यमा सम्पन्न यो कार्यक्रम भएको हो । टेक्सस राज्यको ८९ औं संसदको प्रतिनिधि सभाले वेसाक दिवस (बुद्ध जयन्ती) लाई पवित्र दिवसको रूपमा मान्यता दिने प्रस्ताव पारित गरेको थियो ।

संसार भरि बुद्धको जन्म, बुद्धत्व प्राप्ति र महापरिनिर्वाण (निधन) को सम्झना गर्दै वेसाक दिवस मनाउने चलन छ। बुद्धको जन्म इशापूर्व ५६३ मा लुम्बिनीमा भएको हो । वेसाक दिवस परम्परागत रूपमा मे महिनाको पूर्णिमाका दिन मनाइन्छ । विश्वभरका करोडौं बौद्धहरूले यस पर्वलाई महिनाभर मनाउँछन्।

“यो उत्सव केवल ऐतिहासिक होइन यसको सन्देश पनि अत्यन्त शक्तिशाली छ,” नेप्लिज बुद्धिष्ट एसोसिएसनका महासचिव डा. नीरज बज्राचार्यले भने। कार्यक्रममा ११ देशबाट आएका ५९ भन्दा बढी भिक्षुहरूको सहभागिता रहेको समेत बज्राचार्यले त्यस अवसरमा जानकारी दिए ।

कार्यक्रमको शुरुवात धार्मिक खण्डबाट भयो, जसको नेतृत्व श्रदेय भिक्षु पन्नाकाराले गर्नुभयो, जसको आध्यात्मिक मार्गदर्शनले समारोहलाई रूप दिन महत्त्वपूर्ण भूमिका खेलेको थियो। त्यसपछि, कार्यक्रमको सामान्य खण्डमा सांस्कृतिक प्रस्तुतिहरू, प्रमुख वक्ताहरूका सम्बोधन र अन्तरधार्मिक एकताको अभिव्यक्ति समावेश गरियो।

कार्यक्रमको प्रमुख आकर्षण सुन्दर रूपमा सजिएको मञ्च थियो । जहाँ बुद्धको जन्म, बुद्धत्व प्राप्ति र महापरिनिर्वाणको प्रतीक बुद्ध मूर्तिहरू सजाइएको थियो। कार्यक्रमको धार्मिक खण्ड भियतनामी र नेपाली महिलाहरूले परम्परागत पोशाकमा बुद्धलाई फूल अर्पण गर्दै सुरु भएको थियो। त्यसपछि थेरवाद, महायान र वज्रयान परम्पराका वरिष्ठतम भिक्षुहरूले वेसाक दिवसको सन्देश प्रस्तुत गरेका थिए । जसले विश्व बौद्ध समुदायभित्रको एकता र विविधतालाई सम्मान जनायो।

सोही अवसरमा अमेरिकाभरि निर्माणाधीन रहेका प्रमुख बौद्ध पूर्वाधार परियोजनाहरूको पहिचान थियो। तीमध्ये टेक्ससको फोर्टवर्थ स्थित हुओङ दाओ मन्दिरमा निर्माणाधीन धम्मचेतिया परियोजन बिशेष रुपमा उल्लेखनिय थियो । २० करोड डलरको यो योजनाले ८४० स्तूपा निर्माण गर्ने लक्ष्य राखेको छ ।

सोही अवसरमा टेक्सस राज्यका सांसद सलमान भोजनीप्रति समुदायबाट विशेष आभार प्रकट गरिएको थियो । भोजनीले ८९ औं टेक्सास विधानसभाको प्रतिनिधि सभाबाट वेसाक दिवसको मान्यताको प्रस्ताव पारित गराउन महत्वपूर्ण भूमिका खेलेका थिए।

त्यस अवसरमा अध्यक्ष मकर बज्राचार्यले बुद्धको जन्म भूमि नेपालमा आफु जन्मिन पाएकोमा गर्व व्यक्त गर्दै सबैलाई बुद्धको जन्मस्थल लुम्बिनी भ्रमण गर्न हार्दिक आमन्त्रण गरे ।

सांसद भोजनीका साथमा सांसद सुलेमान ललानी, सांसद वो र अन्य विशिष्ट अतिथिहरूले पनि यस अवसरमा बधाई र कृतज्ञताको मन्तव्य दिएका थिए । टेक्सस क्यापिटलमा पहिलोपटक आयोजना गरिएको उक्त ऐतिहासिक कार्यक्रम समुदायका सदस्यहरू, धार्मिक अगुवाहरू र सार्वजनिक पदाधिकारीहरूको सहयोग र समर्थनले सम्भव भएको हो।