ड्यालस (टेक्सस), अमेरिका । तपाईलाई रिस कत्तिको उठ्छ ? रिस उठ्दा त्यसलाई कसरी साम्य पार्नुहुन्छ ? रिस उठेकै कारणले तपाईको ब्लडप्रेसर, डायबिटिज लगायतले तनाव दिएको त छैन ?

यदी तपाईलाई यस्तो समस्याले पिरोलेको छ भने समाधानका लागि ड्यालसमा पहल सुरु भएको छ । टेक्सस नेप्लिज मेडिकल एसोसिएसनले नेपाली समाज टेक्सस, हिमालय हेल्थ क्लिनिक र नेपाली आध्यात्मिक तथा सांस्कृतिक केन्द्रको संयुक्त आयोजनामा आउँदो आइतबार रिस व्यबस्थापन र मानसिक स्वास्थ जनचेतना कार्यक्रम आयोजना गर्न लागेको छ ।

युटी साउथवेस्टर्न मेडिकल सेन्टरका कन्सल्टिङ्ग डाइरेक्टर डा. नजीब रंगिनवालाले रिस व्यवस्थापन र मानसिक स्वास्थका बारेमा जानकारी दिने कार्यक्रम रहेको छ । मानिसमा स्वभाविक रुपमा रिस आउँछन्, त्यसलाई व्यबस्थापन गर्न नसक्दा ठूला मानसिक समस्याहरु समाजमा देखिएका छन् । त्यसलाई समाधान गर्न र जनचेतना जगाउन यो कार्यक्रम राखेका हौ कार्यक्रमका मोडरेटर एवं टेक्सस नेप्लिज मेडिकल एसोसिएनका अध्यक्ष डा. सञ्जीब श्रेष्ठले भने ।

रिसलाई व्यबस्थापन गर्न सक्ने हो भने मानिस स्वस्थ पनि हुने र समाज पनि सभ्य हुने भएकोले समाजमा यो जरुरी देखिएको उनले बताए ।

मानिसलाई आफूमा मानसिक समस्या रहेको कुरा पत्ता लगाउन गाह्रो हुन्छ । त्यस बारेमा पनि कार्यक्रममा जानकारी गराइनेछ । सेप्टेम्बर १५ तारिक आइतबार बिहान १०ः३० बाट सुरु हुने कार्यक्रम एक घण्टाको हुने र सहभागी भएर लाभान्वित हुन चिकित्सकहरुले आव्हान गरेका छन् ।

कार्यक्रममा सहभागी हुन इच्छुकले लिला श्रेष्ठ, सीता सापकोटा, राज श्रेष्ठ, डा. विष्णुमायाँ उपाध्याय र कमला अधिकारीसँग सम्पर्क राख्न समेत आव्हान गरिएको छ ।