ड्यालस (अमेरिका) । नेपाली नागरिकता त्याग गरिसकेको भएपनि अबदेखि नेपाली जनसम्पर्क समितिको सदस्य हुन पाउने प्रावधान लागु भएको छ ।

नेपाली कांग्रेसले कृयाशील सदस्य वा जनसम्पर्क समितिको सदस्यता लिएका व्यक्तिहरु जनसम्पर्क समितिको नेतृत्वमा आउन सक्नेगरि नयाँ व्यबस्था लागु गरेको छ ।

जनसम्पर्क समितिको अध्यक्ष स्वतः महाधिवेशन प्रतिनिधि र महासमिति सदस्यसमेत हुने हुँदा यसअघि जनसम्पर्क समितिको राजनीतिका लागि क्रियाशील सदस्यता र नेपालको नागरिक हुनु अनिवार्य थियो ।

कांग्रेसको विदेशस्थित जनसम्पर्क समिति हेर्ने ‘नेपाली जनसम्पर्क समिति समन्वय विभाग’को संयोजक केन्द्रीय सदस्य किरण पौडेल छन् । पौडेल नेपाली जनसम्पर्क समितिमा रहन नेपाली मूलका व्यक्ति भए पुग्ने बताए । बाह्रखरीमा प्रकाशित समाचार अनुसार अबदेखि विदेशमा रहने नेपालीमुलका जो कोही जनसम्पर्क समितिको सदस्य हुन पाउने र सदस्य भएपछि नेतृत्वमा जान सक्ने नयाँ व्यबस्था लागु भएको छ ।

“नेपाली जनसम्पर्क समितिको अध्यक्ष निर्वाचित हुन पार्टी विधान तथा नियमावलीबमोजिम नेपाली कांग्रेसको क्रियाशील सदस्यता प्राप्त गरेको नेपाली नागरिक हुनु पर्नेछ,” नेपाली कांग्रेसको विधानको दफा १४ (क)मा भनिएको छ ।

विधानको यो दफासहित निलम्बन गरेर कांग्रेसले जनसम्पर्क समितिकोे अध्यक्ष र सदस्य सम्बन्धित देशकोे नागरिक नै हुने प्रावधान राखेको हो । नेपालको संविधानले नेपाली नागरिकता त्यागेकाहरूलाई गैरआवासीय नागरिकता दिने व्यवस्था गरेको छ । तर, उक्त व्यवस्थाले गैरआवासीय नेपालीलाई राजनीतिकबाहेकका अधिकार दिने व्यवस्था गरेको छ । संविधानले गैरआवासीय नेपालीहरूलाई राजनीतिक अधिकारमा भने प्रतिबन्ध लगाएको छ ।