टेक्सस (अमेरिका) । टेक्ससको वेको सिटी नजिकैको ‘गेटोर स्टप’ ग्याँस स्टेशनमा कार्यरत रहँदा आइतबार बिहान हत्या गरिएको दीपक वलीको परिवारको सहयोगार्थ रकम संकलनार्थ शुभचिन्तकहरुले गोफण्ड खोलेका छन् ।

झण्डै ८० लाख रुपैयाँ दलाललाई बुझाएर गत वर्ष वर्षको जुलाईमा उनी मेक्सिको हुँदै अमेरिका आएका थिए । तर ऋण चुक्ता समेत गरि नसक्दै लुटेराहरुको गोलीले उनको आइतबार बिहान उनी कार्यरत ग्याँस स्टेशनमै निधन भएको थियो ।

परिवारमा वृद्ध पिता, पत्नी र ५ बर्षिया छोरी छन् । अमेरिकामा शवको व्यबस्थापन र नेपालमा विचल्लीमा परेका परिवारलाई थोरै भएपनि भरथेग गर्न सहयोग संकलन सुरु भएको मृतकका आफन्त एवं एनआरएन अमेरिकाका बोर्ड अफ डाइरेक्टर तथा टेक्सस च्याप्टरका पूर्ब उपाध्यक्ष मोहन कुसारीले उल्लेख गरे । कुसारीकै सकृयतामा गोफण्ड खोलिएको हो ।

‘अमेरिकामा रहेका रुकुमेलीहरु साथीहरुले पनि अलग्गै ग्रुप बनाएर सहयोग संकलन गरिरहनुभएको छ । गोफण्डबाट पनि सहयोग संकलन गर्न सुरु गरिएको छ’ कुसारीले जानकारी दिए । अमेरिकाका रुकुमेलीहरुले अहिलेसम्म ३० हजार डलरको हाराहारीमा रकम संकलन गरिसकेका छन् भने गोफण्डबाट यो समाचार तयार पार्दा सम्म झण्डै ५ हजार डलर संकलन भएको छ । गोफण्डमा ६५ हजार डलरको लक्ष्य राखेर रकम संकलन सुरु गरिएको छ ।

मृतक वली घर रुकुमको बाफीकोट–१० मा बासिन्दा हुन् । उनका पिता गाउँमै बाख्रापालन गरेर बस्दै आएका छन् । २६ बर्षिया पत्नी विमला बुढाथोकी भने ५ बर्षकी छोरी पढाउनका लागि भनेर दाङ्गको तुलसीपुर बस्दै आएकी सेतोपाटी अनलाइनले जनाएको छ । अमेरिका आउँदा लिएको ८० लाख ऋण मध्य अहिलेसम्म उनले आधा पनि तिरिनसकेको समेत सेतोपाटीमा उल्लेख छ ।

टेक्ससको वेको सिटी नजिक हाइवे–३५ को एक्जिट ३४६ रसरोडमा रहेको ग्याँस स्टेशनमा कार्यरत ३० बर्षिय वलीलाई लुटेराले कोखामा गोली हानेर हत्या गरेका हुन् । अन्दाजी बिहान ५ बजेको समयमा वली कार्यरत ग्याँस स्टेशनमा आएर दुई लुटेराले गोली प्रहार गरेको बताइएको छ । एक जना श्वेत र अर्का अश्वेत लुटेराहरुले स्टोरमा पसेर एक्कासी गोली प्रहार गरेको र उनको घटनास्थलमै निधन भएको थियो ।

तीन जनाको समुहमा आएका लुटेरा मध्य एकजना भने बाहिर गाडीमै बसेको र दुईजना स्टोरमा पसेर हत्या गरेको बुझिएको छ । मृतक वलीले ग्रीनकार्डको प्रकृया अन्तरगत सुरुमा अहिले असाइलमको आवेदन दिएका थिए ।

लुटेराहरुले उनलाई गोली प्रहार गर्नु अघि बिहान ३ बजेतिर अर्कै ग्याँस स्टेशनमा पुगेर लुटेका थिए । त्यहाँ पनि नेपाली क्लर्कनै कार्यरत थिए । त्यसमा भने लुटेर क्लर्कलाई कुटपिट गरेका थिए ।

‘अहिलेसम्म प्रहरीले शव दिइसकेको छैन । शव हस्तान्तरण भएपछि यहीँ व्यबस्थापन गर्ने तयारी भएको छ’ कुसारीले भने । उनले पीडित परिवारको राहतको लागि अमेरिकामा रहेका सबै नेपालीबाट सहयोगको अपेक्षा राखिएको बताए ।