ड्यालस (अमेरिका) । नेपाली क्रिकेट खेलाडी सन्दीप लामिछानेलाई प्रवेशआज्ञा (भिसा) दिन अमेरिकाले अस्विकार गरेको छ ।

आउँदो महिना अमेरिकामा हुन लागेको विश्वकप क्रिकेट प्रतियोगिताका लागि नेपालबाट थपिएका खेलाडी लामिछानेलाई भिसा दिन काठमाडौं स्थित अमेरिकी दुतावासको कन्सुलर शाखाले अस्विकार गरेको हो । उनलाई भिसा दिन अस्विकार गरेपछि क्रिकेट एसोसिएसन अफ नेपाल (क्यान) का पदाधिकारीहरुले प्रधानमन्त्री पुष्पकमल दाहाल ‘प्रचण्ड’ लाई गुहारेका छन् ।

बिबिसी नेपाली सेवासँगको कुराकानीमा क्यानका अध्यक्ष चतुरबहादुर चन्दले प्रधानमन्त्रीसँग कुरा गरेर अमेरिकी दुतावासमा पत्र लेखाउने बताएका छन् । तर प्रधानमन्त्री दाहालको तर्फबाट भने दुतावासलाई पत्र लेख्न असहमति जनाइएको छ ।

‘भिसा जस्तो विषयमा प्रधानमन्त्रीकै तहबाट पत्र लेख्ने, नोट पठाउने भन्ने कुरा सुहाउने कुरा होइन । भिसा दिने, नदिने कुरा दुतावासको अधिकारको कुरा हो । यसको लागि परराष्ट्र मन्त्रालयले गर्ने हो, प्रधानमन्त्रीको तहबाट यो काम गर्ने भन्ने सुहाउने कुरा होइन’ प्रधानमन्त्री दाहालका प्रेस सल्लाहकार गोबिन्द आचार्यले हिमालयखबरसँग भने ।

बलात्कारको अभियोगमा जिल्ला अदालतले दोषी ठहर्याएपछि लामिछानेको भिसा दुतावासले रद्ध गरेको थियो । तर गत साता उच्च अदालत पाटनले जिल्ला अदालतको निर्णयलाई उल्टाउँदै सफाइ दिएपछि क्यानले विश्वकप खेल्न पठाउने निर्णय गरेको हो ।

तर दुतावासले भिसा रद्ध गरिसकेका कारण उनले पुनः भिसा आवेदन गरे । बुधबार भिसाको लागि इन्टरभ्यू रहेकोमा दुतावासले लामिछानेलाई भिसा दिन अस्विकार गरेको हो ।

क्यानले दुतावासलाई दवाव दिएर लामिछानेलाई भिसा दिलाउन प्रधानमन्त्रीलाई गुहार गरेपनि दाहालले आफ्नो तर्फबाट यो काम नहुने भन्दै परराष्ट्र तिर पन्छाइदिएको स्रोतले बताएको छ । ‘देशको

कार्यकारीको आफ्नै इज्जत र मर्यादा हुन्छ । भिसाको लागि नोट लेख्नै हिड्न प्रधानमन्त्रीको तहबाट सुहाउने कुरा होइन’ स्रोतले भन्यो ।

अर्को स्रोतका अनुसार लामिछानेको भिसाको लागि नेपाली समय अनुसार बिहीबार अमेरिकी दुतावासमा पुनः पहल हुँदैछ । ‘यदी भिसा मिलेमा लामिछाने बिहीबार साँझै अमेरिका उँड्नेछन्’ क्यान कार्यकारी समितिका सदस्य दुर्गाराज पाठकले भने ।

अमेरिकाले महिला संबन्धि मुद्धामा सजायँ पाएका, जेल परेका, चारित्रीक विषयमा विवाद परेका सेलिब्रेटीहरुलाई समेत भिसा अस्विकार गर्दै आएको छ ।

यस पटकको विश्वकप क्रिकेटमा नेपालले आउँदो जुन ४ तारिक नेदरल्याण्डसँग ड्यालस फोर्टवर्थ मेट्रोप्लेक्समा पर्ने ग्राण्डपेरी सिटीको क्रिकेट रंगशालामा खेल्नेछ । बिहान साढे १० बजेबाट खेल सुरु हुनेछ । त्यस्तै नेपालले दोस्रो खेल जुन ११ तारिक फ्लोरिडाको लाउडरहिडमा श्रीलंकासँग खेल्नेछ ।

यसअघि वार्मअप खेलका रुपमा नेपालले मे २७ तारिक क्यानडासँग र ३० तारिक अमेरिकासँग खेल्ने खेल तालिका रहेको छ । अमेरिका र क्यानडासँगका दुबै खेल ग्राण्डपेरी रंगशालामा हुनेछन् ।