हिमालयखबर संवाददाता-

ड्यालस (अमेरिका) । गत सोमबार ड्यालसका एक जना ठूला मध्यमा पर्ने नेपाली मुलका व्यवसायीलाई वित्तीय अपराधको आरोपमा प्रहरीले पक्राउ गर्यो । प्रहरीले ‘मगसट’ सहित सार्वजनिक गरेको विवरणमा उनलाई संस्थागत रुपमा अपराध कार्यमा संलग्न भएको, जुवालाई बढावा दिएको, जुवाघर चलाएको, जुवा खेलाउने उपकरण राखेको आरोप लगाईएको छ ।

उनी अहिले धरौटीमा रिहा भएका छन् । ड्यालस फोर्टवर्थ मेट्रोप्लेक्स वरपर उनका दुई दर्जनभन्दा बढी स्टोरहरू छन् । केही साता यता ड्यालस टेक्ससमा आधा दर्जन नेपाली व्यवसायीलाई यसरी वित्तीय अपराधमा संलग्न भएको आरोपमा प्रहरीले पक्राउ गरिसकेको छ ।

टेक्सस नेपालीहरुको सवैभन्दा धेरै व्यवसाय रहेको राज्य हो । स्टोर, स्मोकसप, रेष्टुरेन्ट लगायतका व्यवसायमा नेपालीहरु संलग्न छन् ।

यहाँका कतिपय स्टोरमा गेम मेसिन राखेर ग्राहकलाई खेल्ने दिने गरिन्छ । गेम मेसिन एक हिसाबले मिनिक्यासिनो हो । नगद राखेर खेल्ने ती मेसिनमा जित्नेलाइ नगद पनि भुक्तानी गरिन्छ । कतिपय ठाउँमा यसरी नगद दिनु कानुन विपरित हुन्छ । यही भएर नेपाली व्यवसायी पक्राउ परेका हुन् ।

टेक्ससमा वैधानिक रूपमा ठूला क्यासिनो छैनन् । राज्यको कानुनमा क्यासिनो खोल्न बर्जित छ । त्यसोहुँदा टेक्ससबासीलाइ टार्गेट गरेर टेक्ससको अोक्लोहामाको सीमाना, लुजियाना र टेक्ससको सीमाना श्रीपोर्टमा ठूला क्यासिनो छन्।

वित्तीय अपराधमा संलग्न व्यवसायीलाई प्रहरीले गोप्य रुपमा अनुसन्धान गर्छ । कानुन विपरित काम गरेको प्रमाण भेटिएपछि पक्राउ गर्छ । केही नेपाली व्यवसायी पक्राउ पर्ने डरले अमेरिका बाहिर गएको पनि बताईएको छ । अन्य थप नेपाली पनि अनुसन्धानको घेरामा परेको हुन सक्ने बताईएको छ ।

स्टोरमा गेम मेसिन राख्ने वाहेक अनलाइन जुवामा पनि केही नेपाली संलग्न छन् । छिटो र सजिलै पैसा आउने भएकाले अनलाइन जुवा खेलाउने बढेका हुन् । यो पनि गैरकानुनी हो । अनलाइन जुवा खाउने र विभिन्न एपहरु मार्फत पैसा कारोवार गर्नेलाई पनि प्रहरीले मिहिन रूपमा खोजी गरिरहेको बताईन्छ ।

केही दिन अघि एक स्टोर मालिक केही ग्राहक प्रति संकेत गर्दै भन्दैथिए-‘किनमेल गर्दा बिटोका बिटा नगद निकाल्छन् । भरखर २५/२६ वर्षका देखिन्छन् । गेम खेलाएर अाएको नगदमा कारोबार गर्छन् ।’ ती व्यबसायीका अनुसार अनलाइन जुवा खेलाउने र पैसा कमाउने लतमा परेका केही विद्यार्थीहरूले कलेज छाडेर ‘अाउट अफ स्टाटस’ भैसकेका छन् ।

अनलाइन जुवा, गेम मेसिन प्रतिस्पर्धाले समाजमा ठूलो विकृती फैलिएको छ । समाजमा यो विषय भुसको अागो जसरी फैलिँदै गएको अग्रजहरू बताउँछन् । ‘छँदाखाँदाको राम्रो जागिर छाडेर मानिसहरू के गररहेका होलान् भनेको त यस्तो धन्दामा युवाहरू सकृय पो रहेछन्’ समाजका अर्का एक अग्रजले अाश्चर्य चकित हुँदै भने ।

पछिल्लो समयमा ट्यारेन्ट काउन्टी, ड्यालस काउन्टीका प्रहरीले निकै कडाइ गर्न थालेको छ । उता अनलाइन जुवामा नेपालमा समेत प्रहरीले कयौंलाई पक्राउ गरेको छ । उनीहरुको नेटवर्क टेक्सससँग जोडिएको हुन सक्ने अनुमान छ । टेक्ससका  व्यवसायी मध्ये अर्का एक जनालाई हालै नेपाल प्रहरीको केन्द्रिय अनुसन्धान ब्यूरोले मुद्दा दायर गरेको थियो ।

छिटो पैसा कमाउने बाटो रोज्दा यसरी नेपाली व्यबसायीहरू पक्राउ पर्न थालेको स्थानीयहरु बताउँछन् ।