तपाई सुपर बलको कत्तिको फ्यान हुनुहुन्छ ? अमेरिकामा सुपर बलको सिजन सुरु भएपछि अफिस, कफिसप, पार्टी जतासुकै यसैको चर्चा परिचर्चा सुरु हुन्छ । अमेरिकामा सबैभन्दा बढी व्यापार हुने अवसर पनि हो यो । मानिसहरु घरमै बसेर टिभीको स्क्रिन, थियटरको अघिल्तिर बसेर मज्जाले खाने र पिउने कुरा लिने भएकोले यसलाई व्यापारको सिजनका रुपमा पनि लिइन्छ ।

तर खेल भएकै रंगशालामा गएर हेर्ने धोको पालेका पनि कमि छैन । जतिसुकै महंगो टिकट भएपनि रंगशालाको एउटा कुनामा बसेर हेर्नुको मज्जा अलग्गै भन्दै मानिसहरु रहर पुरा गर्न जति मूल्य पनि तिर्न तयार देखिन्छन् ।

यसपटक यस्तै भएको छ । आउँदो साता (फेबुअरी ११ तारिक) हुने सुपरबलको यस वर्षको संस्करणको टिकट ऐतिहासिक रुपमा महंगो देखिएको छ । सानफ्रान्सिस्को फोटीनाईन यार्स र कान्सससिटी सेफ बीच हुन लसभेगासको एलिजेन्ट रंगशालामा हुँदैछ । यो खेलको फाइनलको टिकट दर दोस्रो बजारमा औसत ९ हजार डलरभन्दा माथि पुगेको छ । सुपरबलको ५८ औ सिजनको यो प्रतियोगिताको टिकटको माग अहिले निकै बढेको छ ।

टिकट बेच्ने अनलाइन टिकपिकका अनुसार यस पटकको सुपरबलको टिकट मूल्य औसत ९ हजार ५७ डलर छ । जबकी गत वर्षको ५७ औ सिजनको टिकटको औसत मूल्य ५ हजार ७ सय ९५ डलर मात्र थियो ।

यस वर्षको टिकट दर अचाक्ली महंगो हुनुमा स्थानलाई कारण देखाइएको छ । लसभेगास महंगो स्थान भएकोले यस्तो भएको विश्लेषकहरुको दावी छ ।

सिटगीकले राखेको सूचि अनुसार त सुपरबलको यो सिजनको टिकट मूल्य अझै महंगो छ । सिटगीकले जनाए अनुसार प्रति टिकट मूल्य १२ हजार ८२ डलर छ । गत वर्ष स्टेटफार्म स्टेडियम एरिजोनामा भएको ५७ औ सिजनको टिकट मूल्य सिटगीकमा ८ हजार ९ सय ७ डलर थियो ।