अमेरिका । चुनावमा धोकाधडीको आरोप खेपिरहेका अमेरिकाका पूर्व राष्ट्रपति डोनाल्ड ट्रम्पले बिहीबार एटलान्टास्थित फुल्टन काउन्टी जेलमा आत्मसमर्पण (सरेन्डर) गरेका छन् । जेल प्रशासनले अन्य कैदीलाई गरिने प्रक्रियाअनुसार ट्रम्पको फोटो मग सट लिएको थियो ।

जेल प्रशासनले गर्ने अन्य प्रक्रिया पूरा गरेपछि ट्रम्प दुई लाख धरौटीमा करिब २० मिनेटपछि जेलबाट फर्किएका थिए । जेलमा कैदीको नम्बरसहित मग सट फोटो खिचिएको उनी पहिलो पूर्व राष्ट्रपति भएका छन् । जेलले त्यहाँ आउने कैदीको फोटो लिने गर्छ यसलाई मग सट भनिन्छ । यसबाहेक औँलाको छाप लिने लगायतका प्रक्रिया गरिन्छ ।

आफ्नै निजी विमान चढेर ट्रम्प एटलान्टा पुगेका थिए । विमानस्थलबाट मोटरकेडसहित कडा सुरक्षा दिई उनलाई प्रहरीले फुल्टन काउन्टी जेल लगेको थियो । यसबेला उनका समर्थकहरुले ट्रम्पको समर्थनमा नारा जुलुस पनि गरेका थिए । ट्रम्पले सरेन्डर गरेपछि प्रक्रियाअनुसार उनलाई पक्राउ गरिएको त्यहाँको प्रहरीले जनाएको छ ।

आउने राष्ट्रपति चुनावमा पनि ट्रम्पले उमेदवारी दिने घोषणा गरेका छन् । अहिलेको यो जेल यात्राले उनलाई चुनावमा सहयोग पुग्ने खालका विष्लेषण पनि गरिएको छ । अमेरिका पहिलो भन्ने मान्यता राख्ने ट्रम्पका कयौँ कट्टर समर्थक छन् ।

गत राष्ट्रपति चुनावमा नतिजा आफ्नो पक्षमा पार्न धोकाधडी गर्न खोजेको आरोप उनलाई लगाइएको छ । यसबाहेक सरकारी काम कारबाहीमा बाधालगायतका अन्य आरोप पनि उनीमाथि लगाइएको छ । तर, ट्रम्पले यी आरोपमा आफू निर्दोष रहेको र राजनीतिक प्रतिशोधका प्रभावित भन्दै आएका छन् ।