अमेरिका- गैर आवासिय नेपाली संघ (एनआरएनए) भेला तथा विश्व सम्मेलन आउने अक्टोबर १७ वाट २० तारिखमा काठमाडौमा हुने भएको छ । एनआरएनए आईसीसीको आइतवार वसेको कार्यसमिति वैठकले उक्त निर्णय गरेको हो ।

यो समय दशैंको फुलपाती र घटस्थापनाका विचमा पर्छ । यो सम्मेलनले एनआरएनएको नयां नेतृत्व पनि चयन गर्ने छ ।

वैठकले निर्वाचनमा उम्मेदवारी दिन लाग्ने शुल्क पनि घटाउने निर्णय गरेको छ । यो शुल्कमा पहिले भन्दा आधा कम गरिएको छ । यस अनुसार अव अध्यक्षका प्रत्याशीले उम्मेदवार दर्ता गर्दा ५ लाख रुपैंया तिरे पुग्छ। यस अघि यो शुल्क १० लाख थियो । यस्तै महिला उम्मेदवारलाई दर्ता शुल्कमा २५ प्रतिशत छुट दिने पनि निर्णय भएको छ ।

उम्मेदवारी शुल्क घटाउंदा एनआरएनएको आम्दानी घट्ने भएकाले यसलाई घटाउन नहुने भन्ने तर्क पदाधिकारीहरुले राखेका थिए । तर, पनि घटाउनेमै निर्णय भएको बैठकका सहभागीले जानकारी दिए ।

एनआरएनएका विदेशमा रहेका संजाल एनसीसीहरुको साधारण सभा लगभग सकिएको छ । अहिले समाजिक संजाल र मिडियामा उम्मेदवारी घोषणा गर्ने लहर चलेको छ । उम्मेदवार दर्ता शुल्क घट्दा उम्मेदवारको संख्या वढ्ने देखिन्छ ।

एनआरएनए विधान अनुसार यस पटक एक जना मात्र अध्यक्ष र महासचिव हुने छन् । तर, यि पदका आकांक्षीहरु धेरै देखिएका छन् ,
कार्यसमिति वैठकले उक्त भेलाका प्रतिनिधि (डेलिगेट) खुला गर्ने निर्णय पनि गरेको महासचिव गौरीराज जोशीले जानकारी दिए । संघको विधान अनुसार डेलिगेट छनौट खुला गर्ने निर्णय भएको छ जोशीले भने ।

विधान अनुसार चयन हुने डेलिगेटले मात्र चुनावमा मत दिन पाउने छन् । एनसीसीको सदश्य संख्या अनुसार डेलिगेट चयन हुने छ । यस अनुसार अमेरिकावाट २०० भन्दा वढी डेलिगेट हुन पाउंछन् । यो एनसीसीले चयन गरेर आईसीसीलाई पठाउंछ ।

चुनावभने हाइब्रिड हुने भएको छ । डेलिगेटले अनलाइनवाट मत हाल्ने छन् । तर, उम्मेदवारका प्रस्ताव र समर्थक भने भेलामा उपस्थिति हुनु पर्ने छ । यस सम्वन्धि सम्पुर्ण प्रकृया निर्वाचन समितिले तय गर्ने छ ।