न्यूयोर्क (अमेरिका) । गैर आवासीय नेपाली संघ (एनआरएनए) अमेरिकाको नेतृत्वका लागि भएको निर्वाचनमा डा. अर्जुन बञ्जाडे अध्यक्षमा निर्वाचित भएका छन् ।

स्वतन्त्र रूपमा हिमालयखबरले प्राप्त गरेको जानकारी अनुसार डा. बञ्जाडेले ५ हजार ७ सय ३९ मत ल्याएर अध्यक्षमा निर्वाचित भएका हुन । अध्यक्ष पदका लागि दुई जनाको उम्मेदवारी परेको थियो । अर्को उम्मेदवार डिलु पराजुलीले ४ हजार ८ सय ६ मत ल्याएर उपविजेता भए ।

एनआरएनए अमेरिकामा करिव १३ हजार ६ सय ९१ मतदाता थिए । शनिवार र आइतबार  भएको निर्वाचनमा ११ हजार दुइसय ६९ मत खसेको थियो ।

चुनावमा दुई प्यानल बनाएर चुनाव लडेको भए पनि मिश्रीत नतिजा आएको छ । वरिष्ठ उपाध्यक्षमा विकास उप्रेतीले जितेका छन् । उनले ४ हजार ९ सय ४५ हजार मत ल्याए । तर, यो पुष्टि हुन भने बाँकीनै छ । उनका प्रतिद्वन्दी अञ्जन कुमार चौलागाईले  चारहजार सातसय ३५ मत पाए ।

त्यस्तै महासचिवमा रामहरि अधिकारीले जितेको खबर प्राप्त भएको छ । अधिकारीले ५ हजार एकसय ५७ मत प्राप्त गरेर विजयी हुँदा गोपेन्द्र भट्टराइले ४ हजार चारसय ३९ मत प्राप्त गरे ।

कोषाध्यक्षमा सरोज सिग्देल विजयी भएका छन् । सिग्देलले ४ हजार ६ सय ९४ मत प्राप्त गरेर विजयी हुँदा उनका प्रतिस्पर्धी अमित शर्माले चारहजार ६ सय ५४ मत पाएका छन् । कोषाध्यक्षमा ४० मतको अन्तरले सिग्देल विजयी भएका छन् ।

अन्य उम्मेदवारहरूको परिणाम प्राप्त हुनासाथ  हिमालयखबरले प्रकाशित गर्नेछ ।