अमेरिका । नेपालले कम्युटरमा आधारित सूचना प्रविधि व्यवसाय (आइटी) क्षेत्रबाट वार्षिक ५० अर्ब रुपैयाँ बढी विदेशी मुद्रा आर्जन गर्दै आएको प्रतिवेदन सार्वजनिक भएको छ । यो नेपालले पर्यटन क्षेत्रबाट आम्दानी गर्नेभन्दा बढी विदेशी मुद्रा हो ।

आर्थिक क्षेत्रसँग सम्बन्धित विषयमा अध्ययन अनुसन्धान गर्दै आएको संस्था सर्वागीण विकास अध्ययन संस्था (आइआइडिएस)ले गरेको सर्वेक्षणले आइटी क्षेत्रबाट वार्षिक ५० करोड १५ लाख डलर प्राप्त हुँदै आएको उल्लेख छ ।

उक्त केन्द्रका अध्यक्ष तथा सांसद डा स्वर्णिम वाग्लेले उक्त सर्वेक्षण सार्वजनिक गर्दै करिब ६७ हजार नेपाली आइटी कम्पनीमा संलग्न रहेको जानकारी दिए । आइटीमा काम गर्न करिब ७ हजार नेपाली कम्पनी स्थापना भएका छन् ।

अमेरिकाले नेपालको आइटी क्षेत्रलाई सहयोग गर्न चाहिरहेको बेला यो तथ्यांक सार्वजनिक भएको हो । अमेरिकी सरकारका उच्च अधिकारीहरुले पटक पटक नेपालको आइटी क्षेत्रको प्रवर्द्धनका लागि अमेरिका सहयोग गर्न इच्छुक रहेको बताउँदै आएका छन् ।

नेपालमा आइटी व्यवसायको सम्भावना भएको क्षेत्र भएकाले अमेरिकाले यसको प्रवर्द्धनका लागि सहयोग गर्न चाहेको हो । अहिले नेपालका विभिन्न सहरमा आइटी पढाउने कलेज खुलेका छन् । यसमा हजारौँ विद्यार्थी अध्ययनरत छन् ।

आइटी क्षेत्रमा ठूलो सम्भावना रहे पनि हालै सार्वजनिक बजेटमा यस क्षेत्रका लागि झारा टार्ने गरी कार्यक्रम राखिएको वाग्लेले गुनासो गरे ।

नेपालको आइटी क्षेत्रमा अमेरिका बस्ने नेपालीले कसरी योगदान दिन सक्छन् भन्ने विषयमा पनि अमेरिकामा चासो बढेको छ । नेपालीले स्थापना गरेका केही आइटी कम्पनीले यसका लागि अमेरिकामा पहल गरिरहेका छन् ।