ह्युस्टन । अन्तर्राष्ट्रिय नेपाली साहित्य समाज ह्युस्टन च्याप्टरको हिजो शनिवार सम्पन्न वार्षिक साधारण सभाले साहित्यकार एबं इन्जिनियर सतिश त्रिपाठीको अध्यक्षतामा सर्वसम्मत नयाँ कार्यसमिति निर्वाचित गरेको छ ।

 

नव निर्वाचित कार्यसमितिको  वरिष्ठ उपाध्यक्षमा मुना पौडेल, उपाध्यक्षमा साधना शर्मा र महासचिवमा मोदनाथ सादा चयन भएका छन् भने सचिव र कोषाध्यक्षमा क्रमशः निलहरि आचार्य र अमृत लामिछाने छानिएका छन् । 

 

यसैगरी सदस्यहरूमा उषा पन्थी, शेषकान्त बराल र उमा शर्मा चयन भएका छन् । कार्यसमितिमा थप सदस्यहरु अध्यक्षले मनोनित गर्ने व्यवस्था रहेको अनेसासका निवर्तमान अध्यक्ष बासु पौडेलले हिमालय खबरलाई जानकारी गराएका छन् । 

 

साधारण सभामा अनेसास ह्युस्टन च्याप्टरको स्थापना कालदेखि संस्थाको श्रीवृद्धि र अनेसासका हरेक क्रियाकलापहरुमा सहयोग पुऱ्याएकोमा कमल पन्थी र उषा पन्थीलाई सम्मान गरिएको थियो। अनेसासका पूर्वअध्यक्ष शेष शर्मा र संस्थापक मुना पौडेलले सो सम्मान प्रदान गरेका थिए।

 

सभाले कार्यसमितिबाट प्रस्तुत भएको अन्तर्राष्ट्रिय नेपाली साहित्य समाज ह्युस्टन च्याटरको विधान २०२१ अनुमोदन गर्नुका साथै च्याप्टरको वार्षिक प्रगति प्रतिवेदन र आर्थिक प्रतिवेदन समेत पारित गरेको थियो। 

 

निर्वाचन प्रक्रियाको अध्यक्षता बिलोल पोख्रेलले गरेका थिए भने वार्षिक साधारण सभा च्याप्टरका निवर्तमान अध्यक्ष बासुदेव पौडलको अध्यक्षतामा सम्पन्न भएको थियो । 

 

गजल विधामा ह्युस्टन र नेपाली(अमेरिकन साहित्यका क्षेत्रमा चर्चित सर्जक सतिश त्रिपाठीको नेतृत्व पाएको अनेसास ह्युस्टनले आगामी दिनमा नेपाली भाषा, संस्कृति र साहित्य प्रवर्द्धनमा गर्ने गतिविधीले नेपाली समुदायको चासो बढाउने अपेक्षा गरिएको छ।