न्यूयोर्क । अमेरिकी लगानीकर्ताहरुलाई नेपालमा लगानी गर्न नेपाली महावाणिज्य दूतावासले आह्वान् गरेको छ । न्यूयोर्कस्थित नेपाली महावाणिज्य दूतावासले नेपालमा लगानीका अवसरहरु विषयक अन्तर्क्रिया कार्यक्रम गरी अमेरिकी लगानीकर्ताहरुलाई नेपालमा लगानी गर्न आह्वान् गरेको हो । 

 

नेपाल अमेरिका कूट्नीतिक सम्बन्धको ७५ औँ वार्षिकोत्सवको अवसर पारेर न्यूयोर्कको म्यानह्याटनमा आयोजना गरिएको अन्तर्क्रिया कार्यक्रममा न्युयोर्क र न्यूजर्सी राज्यका व्यवसायीहरुको सहभागिता रहेको थियो । ग्रेटर न्यूयोर्क चेम्बर अफ कमर्शसँगको सहकार्यमा महावाणिज्य दूतावासले बिहीबार आयोजना गरेको कार्यक्रममा दुई पक्षीय सम्बन्ध एवं लगानी प्रवर्द्धनका विषयमा छलफल भएको थियो । 

 

कार्यक्रममा कार्यबाहक महावाणिज्यदूत विष्णुप्रसाद गौतमले नेपालको वैदेशिक लगानी नीति, कानुनी र संस्थागत संरचना एवं लगानीलाई प्रोत्साहन गर्न तथा व्यवसाय प्रवर्द्धन गर्न विदेशी लगानीकर्ताहरूलाई प्रदान गरिएका लगानी र सुविधाका प्रमुख क्षेत्रहरूबारे जानकारी गराएका थिए । 

 

उनले नेपालमा आर्थिक वृद्धि र रोजगारी सृजनाका लागि अमेरिकी लगानीकर्ताको लगानी र सहयोगको प्रशंसा पनि गरे । कार्यक्रममा कार्यवाहक महावाणिज्यदूत गौतमले “नेपालमा लगानीका अवसरहरूः साझा समृद्धिको लागि मित्रता र व्यवसाय प्रवर्द्धन” विषयमा कार्यपत्रसमेत प्रस्तुत गरेका थिए । 

 

उदार र खुला वैदेशिक लगानी नीति र लगानीका विभिन्न क्षेत्रमा उपलब्ध अवसरहरूमा केन्द्रित उनले कार्यपत्रमा लगानी बोर्ड नेपालको प्रोजेक्ट बैंक, पूर्वाधार र दिगो विकासमा सहयोग गर्ने अन्य उदीयमान क्षेत्रका प्रमुख आयोजनाहरूका बारेमा उल्लेख गर्दै नेपालमा लगानी गर्न आह्वान् गरे । 

 

कार्यक्रममा ग्रेटर न्यूयोर्क चेम्बर अफ कमर्सका अध्यक्ष एवं सीईओ मार्क जाफले आफ्नो उद्घाटन मन्तव्यमा नेपालका चेम्बर र कन्सुलेट जनरल तथा न्यूयोर्कमा नेपाली व्यापारी समुदायबीचको साझेदारी विकास हुनुपर्ने विचार राखेका थिए । उनले नेपालसँग व्यापार आदानप्रदान र अन्तर्क्रिया प्रवर्द्धन गर्नुपर्ने विचार व्यक्त गरे ।

 

कार्यक्रममा चर्चित व्यवसायी डा. लियोङ यिङले नेपालसँगको आफ्नो वर्तमान संलग्नताको अनुभव स्मरण गरेका थिए । उनले नेपालमा चिकित्सा, पर्यटन, पूर्वाधार परियोजनामा प्रस्तावित लगानीलाई अन्तिम रूप दिने आशा व्यक्त गरेका थिए । त्यस्तै अर्का व्यवसायी जोन मेसरले विश्वका विभिन्न भागमा आफ्नो कम्पनीको उपस्थितिका बारेमा प्रष्ट्याउँदै नेपालमा नवीकरणीय उर्जा, कृषि लगायत हरियाली प्रवर्द्धनका क्षेत्रमा लगानी गर्न इच्छुक रहेको जानकारी गराएका थिए । 

 

सम्भावित लगानीकर्ता, चेम्बरका सदस्य, एनआरएन प्रतिनिधि, नेपाली अमेरिकी व्यवसायी तथा व्यावसायिक समुदायले पनि नेपालमा लगानी पर्वद्धनका लागि आफ्नो विचार, सुझाव, भूमिका र योगदानको बारेमा धारणा राखेका थिए ।

 

कार्यक्रममा न्यूयोर्कका व्यवसायी समुदायलाई नेपालमा हालको लगानीको वातावरण र अवसरहरू, कानुनी प्रक्रिया एवं प्रोत्साहनका बारेमा विशेष जानकारी गराउनुका साथै डायस्पोराका नेपाली व्यवसायी तथा व्यावसायिक समुदायसँग जोडिने अवसर प्रदान गरेको थियो ।