अमेरिका समाचार

टेक्सस ड्यालसमा नेपाली समुदायसंग छलफल गर्दै स्टेट डिपार्टमेण्ट

प्रकाशित |
अमेरिका- युएस डिपार्टमेण्ट अफ स्टेट ब्यूरो अफ साउथ एण्ड सेन्ट्रल एसियन अफेयर्सले विहिवार टेक्ससमा नेपाली अमेरिकन समुदायसंग राउण्ड टेवल छलफल आयोजना गरेको छ । 
 
नेपाल-अमेरिका दौत्य सम्बन्धको ७५औं वर्सिकोत्सवको सेरोफेरोमा हुन  लागेको  उक्त छलफलमा स्टेट डिपार्टमेण्टका एसिस्टेण्ट सेक्रेटरी डोनाल्ड लु लगायतका अधिकारी सहभागी हुने कार्यक्रम छ ।  
 
नेपाली समुदायका धारणा, दुई देश विचको सम्वन्ध लगायतका विषयमा खुला छलफल गर्न उक्त कार्यक्रम आयोजना गरिएको सहजकर्ता उत्तम कार्कीले जानकारी दिए ।
 
हामीले यस्तो कार्यक्रम केही समय अघि देखिनै गर्न चाहेका थियौं अहिले अवसर जुर्यो, कार्यक्रममा सहभागी हुन लागेका वेद वस्नेतले भने, समुदायका लागि पहिलो र निकै राम्रो अवसर जुरेको छ । 
 
बैठकमा सहभागी हुन टेक्सस ड्यालसमा वस्दै आएका करिव ३६ जनालाई निमन्त्रणा गरिएको छ । केही आमन्त्रितहरु शहर वाहिर भएकाले आयोजकले यस मध्ये ३० जना जति सहभागी हुने जनाएका छन् । पहिलेनै नाम उल्लेख भएका मात्र छलफलमा सहभागी हुन सक्छन् । समुदायमा सकृय सवैलाई सकेसम्म समेटिएको बस्नेतले जानकारी दिए । 
 
बैठकमा ६ जना समुदायका प्रतिनिधि डा प्रेम अधिकारी, भिम कार्की, डा अजुर्न बञ्जाडे, प्रभात दीक्षित, राजेन्द्र वाग्ले र चण्डी भण्डारीले ६ वटा नेपाली समुदायका चासोका विषयमा बोल्ने कार्यक्रम छ । 
 
केही समय खुला छलफलका लागि छुट्याईएको छ । स्टेट डिपार्टमेण्टका अधिकारीले खुला बातावरणमै छलफल होस भन्ने चाहनु भएको छ त्यही अनुसार कार्यक्रम वनाईएको कार्कीले जानकारी दिए । 
 
उक्त अवसरमा नेपाल अमेरिका सम्वन्ध, नेपाली समुदायको व्यवसाय,  समुदायले गर्दै आएको गतिविधि  लगायतका विषयमा ६ जना वक्ताले वोल्ने छन् ।  उक्त अवसरमा के के कुरा राख्नेभन्ने वारेमा पनि छलफल भएको थियो । उक्त छलफलको संयोजन नेपाली समाज टेक्सस (एनएसटी)ले गरेको छ । 
 
नेपाल र अमेरिकाको कुटनीतिक सम्वन्ध कस्तो हुनुपर्छ भन्ने विषयमा नेपालले भने यहां वस्ने नेपाली समुदायको धारणा अहिलेसम्म औपचारिक रुपमा लिएको छैन । हाल यहां वसोवास गर्ने नेपाली समुदायको चाहनाका आधारमा कुटनीतिक सम्वन्ध हुनुपर्छ भन्ने नेपालीहरुले चाहेका छन् । तर, यस अनुसार भने हुन सकेको छैन । 
 
नेपाल र अमेरिका विचको सम्वन्ध मजबुत भईरहेको वेला यस्तो छलफल आयोजना गर्न लागिएको हो । नेपालका प्रधानमन्त्री शेरबहादुर देउवाले निकट भविश्यमा औपचारिक रुपमा अमेरिका भ्रमण गर्ने कार्यक्रम छ । यसवाहेक अमेरिका र नेपालका वरिष्ठ सरकारी र सेनाका अधिकारीहरु विच भ्रमण आदानप्रदान भईरहेको छ । 
 
टेक्ससको  ड्यालस-फोर्टवर्थ क्षेत्र नेपाली समुदायको ठुलो वस्ती भएको क्षेत्र हो ।  यहां व्यवसाय र समुदायिक कार्यक्रममा सकृय नेपालीको संख्या पनि उल्लेख्य छ । टिका पौडेलले केही महिना अघि युलेस सिटी काउन्सिलमा चुनाव जितेका थिए । यसपछि पनि केही पदमा नेपालीले प्रतिस्पर्धा गरेका थिए । 
 
अमेरिका नेपाली समुदायको सवैभन्दा ठुलो बसोबास भएको क्षेत्र हो । अमेरिकावाट बार्षिक अरबौ रेमिट्यान्स नेपाल जाने गरेको छ । यहां करिव ४ लाख नेपाली समुदायको बसोवास भएको अनुमान छ ।

नेपाल जाने पर्यटक संख्यामा पनि अमेरिकी पर्यटकको संख्या उच्च छ । अमेरिकाले बर्षेनी विभिन्न क्षेत्रमा नेपाललाई आर्थिक सहयोगकाअतिरिक्त शिक्षा , स्वास्थ्य ,कृषि लगायतका क्षेत्रमा उल्लेख्य सहयोग गर्दै आएको छ ।


यो खबर पढेर तपाईलाई कस्तो महसुस भयो ?

प्रतिक्रिया