सान् फ्रान्सिस्को (अमेरिका)- उत्तर अमेरिकास्थित सान् फ्रान्सिस्कोमा “नेपाल डे परेड” भव्य रूपमा गरिने भएको छ । नेपाली नयाँ वर्ष २०७९ को अवसर पारेर गरिन लागिएको सो परेड कार्यक्रमको तयारी अन्तिम चरणमा पुगेको आयोजकले जानकारी दिएका छन् । गैरआवासीय नेपाली सङ्घ अमेरिका वेस्टकोस्ट रिजन र क्यालिफोर्निया च्याप्टरको संयुक्त आयोजना एवम् क्यालिफोर्नियाका विभिन्न संघ-संस्थाको सहकार्यमा सो परेड कार्यक्रम हुन लागेको परेड मूल आयोजक समितिमार्फत जारी विज्ञप्तिमार्फत जानकारी दिइएको छ ।

 

सो परेड कार्यक्रम यही अप्रिल ९ तारिख शनिबारका दिन बिहान ११ बजे सान् फ्रान्सिस्कोको एम्बर्कादेरोबाट सुरु भएर सिभिक सेन्टरको यूएन प्लाजामा पुगेर कोण सभामा परिणत हुने विज्ञप्तिमा जनाइएको छ ।

 

कार्यक्रमलाई भव्य र सभ्य बनाउन विभिन्न उपसमिति बनाइएको छ । कार्यक्रम मूल समिति संयोजकमा एनआरएनए यूएसए वेस्टकोस्ट रिजनका रिजनल चेयर श्रीराम थापा रहेका छन् । यसैगरी, सचिवालय संयोजकमा हरि ओझा, आर्थिक समितिमा क्रमशः राजेश थापा, प्रितेश कार्की र नारायण खनाल, संघ-संस्था संयोजन समिति संयोजकमा उत्तम कार्की, सांस्कृतिक समिति संयोजकमा निर्मल फुयाँल रहेका छन् । यस्तै, सञ्चार समिति संयोजकमा उत्तम धमला, स्वयंसेवक व्यवस्थापन समिति संयोजकमा प्रमराज केसी, होस्पिटालिटी एन्ड म्यानेजमेन्ट संयोजकमा रविसिंह बस्नेत एवम् आईटी समिति संयोजकमा अभिषेक ज्ञवाली रहेका छन् ।     

 

कार्यक्रममा क्यालिफोर्नियालगायत अमेरिकाभरिबाटै ठुलो संख्यामा सहभागिता हुने अपेक्षा आयोजकले राखेको छ । नेपाल, नेपाली भाषा, कला र संस्कृतिलाई विश्वसमुदायमा परिचित गराउने उद्देश्यले सो कार्यक्रम गर्न लागिएको हो । सो कार्यक्रममा विभिन्न जातजाति र समुदायमाझ परिचित संस्कृति झल्काउने झाँकी र वेशभूषासहित परेडमा सहभागिता जनाइने छ ।

 

यसैगरी, आयोजकले कार्यक्रममा उपस्थितिका लागि अनुरोध गर्दै अन्य राज्यबाट सहभागिता जनाउन आउने पाहुनाहरुका लागि सान् फ्रान्सिस्को फाइनान्सियल डिस्ट्रिक्टमा रहेको होटेल हिलटनमा कोठाहरु बुकिङ गरिएको र विमानस्थलबाट पिकअप र ड्रपअफको समेत व्यवस्था गरिएको जनाएको छ । 

 

सोही दिन सान् फ्रान्सिस्कोस्थित युनाइटेड आइरिस कल्चर सेन्टरको हलमा सांस्कृतिक कार्यक्रमको पनि आयोजना गरिएको छ । सो सांस्कृतिक कार्यक्रम संयोजक निर्मल फुयाँलका अनुसार सो कार्यक्रममा भ्वाइस अफ नेपाल सिजन ३ का विजेता किरण गजमेर, लोक गायक मिलन लामा, गायिका संगीता थापा मगर, गायक उदय भट्टराईलगायत अन्य स्थानीय कलाकारहरुको प्रस्तुति रहने छ । 

 

प्रवेश शुल्क $३० रहेको सो कार्यक्रममा डिनरको पनि व्यवस्था गरिएको छ । सांस्कृति कार्यक्रममा सहभागी हुनका लागि टिकट www.thingsnepali.com बाट अनलाइन काट्न सकिने कार्यक्रमका आईटी एवम् डिजाइनिङ संयोजक अभिषेक ज्ञवालीले जानकारी दिए ।