अस्टिन (टेक्सास)- टेक्सास अस्टिनमा अप्रिल ६ मा कामवाट फर्किएका नेपाली रमेश थापालाई गोली हान्न अभियुक्त पक्राउ परेका छन् । ग्यांस स्टेशनमा काम गरेर अपार्टमेण्टमा फर्किएका पोखरा घर भई अस्टिन बस्ने रमेशलाई उक्त व्यक्तिले गोली प्रहार गरेको आरोपमा अस्टिन प्रहरीले पक्राउ गरेको हो । यसवाट रमेशको घटनास्थलमै मृत्यु भएको थियो । 

 

टेक्सास राज्यको फरार अभियुक्त पक्राउ गर्ने टाक्स फोर्सले उक्त आरोपमा २३ बर्षिय फ्रान्कोईस ओ निललाई वुधवार सांझ अस्टिनवाटै समातेको जनाएको छ । उनी अर्को गोलि काण्ड सम्वन्धि अपराधमा पनि संलग्न भएको प्रहरीले जनाएको छ । 

 

प्रहरीका अनुसार रमेश थापालाई गोली प्रहार गर्नु अघिल्लो दिन उनले अस्टिनमा एक जनालाई गोली प्रहार गरेर घाइते वनाई भागेका थिए । प्रहरीले ओ निलको फोटो पनि सार्वजनिक गरेको छ । 

 

प्र्रहरीले अप्रिल ६ को कन्कर्ड अपार्टमेण्टमा रमेशलाई राती साढे १२ बजे गोली  चलाई हत्या गर्ने पनि ओ निलनै भएको वताएको छ । 

 

प्रहरीका अनुसार रमेश थापा अपार्टमण्टको पाकिर्ग लटमा आफ्नो गाडीसंगै गोलीवाट घाइते अवस्थामा लडिरहेको भेटिएका थिए । हत्याराले गाडीवाट समान झिक्न पछाडीको ढोका खोलेको वेला रमेशलाई गोली हानेको हुन सक्ने प्रहरीले जनाएको छ । प्रहरीका अनुसार घटना स्थलमा  पुग्दा गाडीको पछाडीको ढोका खुला थियो र घरायसी खानपानका ग्रसरी समान भुईंमा छरिएका थिए । गोली प्रहारका वेला कारमा रमेश एक्लै थिए । हत्याराले थापालाई ६ वटा गोली चलाएको भेटिएको थियो । त्यसले गर्दा उनको घटनास्थलमै मृत्यु भएको थियो । अघिल्लो दिनको गालीको कार्टिजसंग हत्याराले रमेशलाई चलाएको गोलीको कार्टिज मिलेको प्रहरीले जनाएको छ । 

 

किन रमेशलाई गोली प्रहार गरे खुलेको छैन । रमेश काम सकेर  निस्केका वेला हत्याराले पछ्याउंदै गएकाले गोली चलाउने कारण लुटपाट वा अन्य दुस्मनी पनि हुन सक्ने अनुमान पनि गरिएको छ । प्रहरीले यसवारेमा पनि अनुसन्धान भईरहेको जनाएको छ । 

 

प्रहरीले सडकका क्यामरा अनुसन्धान गर्दा हत्याराले उनलाई सेतो किया गाडीवाट पछ्याउंदै आएको देखिएको छ । रमेशको कार अपार्टमेण्ट कम्लेम्समा भित्र पसेर रोकिए लगत्तै हत्याराले गोली चलाएको थियो । उक्त गाडी ओ निलकै नाममा रजिष्ट्रार छ । घटना लगत्तै प्रहरीले हत्याराको खोजविन शुरु गरेको थियो । 

 

यस अघि ओ निलले आफ्नै साथीलाई ५ राउण्ड गोली प्रहार गरेको आरोपपनि प्रहरीले लगाएको छ । 

 

यी विभिन्न अपराधमा संलग्न ओ निलाई स्थानिय ट्राभिस काउण्टी जेलमा पठाईएको छ । बाहिर निस्कन उनीसंग १० लाख अमेरिकी डलरको बोण्ड मागिएको छ । 

 

करिव ४० बर्षका नेपाली युवा रमेशको शव नेपाल पठाउन सहयोग संकलन गरिएको छ । सहयोगको लागि यहाँ थिच्नुहोला।