ड्यालस (टेक्सस) । जीवनमा एक पटक पनि गुल्मी पुग्ने अवसर नपाएहरुदेखि लिएर गुल्मीमै हुर्किएर अमेरिका आएका अनि अमेरिकामा पैदा भएका स साना नानीहरुले आइतबार गुल्मी जिल्लाबारे जान्ने मौका पाए ।

गुल्मेली चौतारीले टेक्ससको ड्यालसफोर्टवर्थमा पर्ने युलेस सिटीमा आइतबार पिकनिक सहितको मौलिक संस्कृति प्रदर्शन गरेको थियो । त्यस अवसरमा शताब्दीयौ पहिले बाइसे चौबिसे रजौटाहरुको समयमा सुरु भएको सराय नाच, पट्टा नाच लगायतका संस्कृति गुल्मेलीहरुले देखाएका थिए ।

टेक्सस भरिबाट जम्मा भएका गुल्मेलीहरुले सहभागीहरुलाई निशुल्क खानाको व्यबस्था गर्नुका साथै बिहानदेखि दिउँसोसम्म भरपुर मनोरञ्जन देखाएका थिए ।

‘गुल्मी र त्यस भेगमा जिल्लाहरुमा बडादशैंको अवसरमा कोटहरुमा देखाइने सरायँ नाच अहिलेको नयाँ पुस्तालाई जानकारी दिन पाउँदा निकै खुशी लाग्यो’ गुल्मेली युवा सागर अर्यालले हिमालयखबरसँग भने । पिकनिकमा गुल्मीबाट टेक्ससमा आएर बसेका, नेपालबाट भ्रमण भिसामा आएका बा आमाहरु, अन्य जिल्लाबाट आएकाहरुको समेत उल्लेख्य सहभागिता थियो ।

त्यस अवसरमा पञ्चेबाजाको साथमा गुल्मेली लोकनृत्य, अन्य बिभिन्न प्रतियोगिता समेत भएका थिए । ‘अरुको पिकनिक मात्र हुन्छ, हाम्रो चाँही गुल्मीको सांस्कृतिक पक्षबारे पनि जानकारी दिउँ भन्ने लक्ष्य लिएर अलिक तयारी गरेर पिकनिक गरेका हौ’ ड्यालसका चर्चित रियल्टर सूर्य थापाले भने ।