ड्यालस (अमेरिका) । महिलाहरुले आफ्नो चाडका रुपमा लिएर मनाउने तीज यस वर्ष नेपालभन्दा बाहिर प्रवासमा समेत भव्य रुपमा मनाइएका छन् ।

तीजलाई विशेषगरि नेपाली हिन्दु नारीहरुले आफ्नो पर्वका रुपमा शिवजीको ब्रत बसेर पतिको दीर्घायुको कामना गरेर मनाउने गरेको जनविश्वास छ । तीजको ब्रतको दिन र पञ्चमीका दिन नेपाली हिन्दु नारीहरुले अमेरिकामा रहेका बिभिन्न हिन्दु मन्दिरहरुमा गएर ब्रत र पूजा गरेका थिए ।

यसै क्रममा अमेरिकामा नेपालीहरुको सबैभन्दा धेरै बसोबास रहेको टेक्ससको ड्यालस फोर्टवर्थ मेट्रोप्लेक्समा रहेको नेपाली मन्दिरमा महिलाहरुको ठूलो भीड लागेको थियो । तृतीयाको दिन ठूलो संख्यामा ब्रत सहित पूजा गर्न आउने महिलाहरुको भीड युलेस स्थित पशुपतिनाथ तथा बुद्ध मन्दिरमा लागेको थियो ।

अमेरिकाको तिथिलाई आधार मानेर ब्रत बस्नेले विहीबार मन्दिरमा पूजा गरेका थिए भने नेपालकै पात्रोलाई पछ्याएर मनाउने महिलाहरुले शुक्रबार गरेका थिए । बिहीबारको तुलनामा शुक्रबार ब्रत सहित पूजा लगाउनेको संख्या भने निकै बढी थियो ।

तीज नेपाली र भुटानी हिन्दु महिलाहरुले मात्र मनाउने पर्व हो । भारतीय, मौरिसस लगायतका देशमा रहेका हिन्दु महिलाहरुले तीजलाई मनाउने गरेको पाइदैन । शुक्रबार युलेसको पशुपतिनाथ मन्दिरमा मात्र नभएर ड्यालस फोर्टवर्थमा रहेका भारतीय समुदायले स्थापना गरेका अन्य हिन्दु मन्दिरमा पनि नेपाली महिलाहरुको उल्लेख्य सहभागिता थियो ।

डिएफडब्लु हिन्दु टेम्पल, श्रीराम मन्दिर प्लानो लगायतमा पनि ठूलो संख्यामा नेपाली महिलाहरु पूजाका लागि पुगेका थिए । शुक्रबार मात्र पशुपतिनाथ तथा बुद्ध मन्दिरमा पाँचवटा समूहमा तीजको पूजा गरिएको थियो ।

आइतबार पञ्चमी पूजा गर्नका लागि पनि महिलाहरुको विशेष उत्साह र भीड मन्दिरमा थियो । पञ्चमीपूजा समापनसँगै यसवर्षको तीज पनि समाप्त भएको छ ।