ह्युस्टन (टेक्सस) । मुना पाण्डेको हत्या अभियोग लागेका बबी सिंंह शाहको जन्म नेपालमा भएको खुलेको छ ।

सन् १९६० को दशकमा भारतको जम्मु कस्मिरबाट दर्शन सिंह नेपाल आएका थिए । उनका दुइ छोराहरु अमित र बबी सिंह काठमाडौंको डिल्लीबजारमा जन्मिएका थिए । ट्रान्सपोर्ट कम्पनीमा काम गर्नेगरि भारतबाट आएका दर्शन सिंहले पछि काठमाडाैँमा रेष्टुरेन्ट सुरु गरे ।

काठमाडौंबाट सञ्चालिन अनलाइन न्युजपोर्टल बाह्रखरीमा प्रकाशित समाचार अनुसार दर्शनसिंहले ट्रान्सपोर्ट व्यबसाय छाडेर सुन्धारामा इन्द्रपुरी रेष्टुरेन्ट खोलेका थिए । पछि विस्तार गर्दै पाखोमा मोतीमहल रेष्टुरेन्ट पनि खोले । पछि ती दुबैलाई बन्द गरेर थापाथलीचोकमा पञ्जाबीढावा समेत चलाएका थिए ।

मुनाको हत्या अभियोगमा हाल थुनामा रहेका बबीले काठमाडौंको सेन्ट जेभियर्सबाट स्कुल सुरु गरेर पछि चोभारको मोडर्न इण्डियन स्कुलबाट हाइस्कुल पुरा गरेका थिए ।

बाह्रखरीका अनुसार उनी ३० वर्ष अघि अमेरिका आएका थिए । उनी कोभीड सुरु हुनु भन्दा केही समय अघि नेपाल पुगेर आएका थिए । ललितपुरको फ्रेण्ड्स क्लबबाट फुटबल समेत खेल्ने गरेका थिए । बबीका पिता दर्शन सिंहको निधन हुँदा उनकी आमा नेपाल गएकी थिइन् ।

उक्त घटनामा मारिएकी मुनाको भोली सोमबार ह्युस्टनमा अन्त्येष्टी हुँदैछ । 8514 Tybor Dr, Houston, TX 77074 मा उनको अन्त्येष्टी हुने गरि तय गरिएको छ । उनकी आमा शुक्रबार नै ह्युस्टन आइसकेकी छिन् ।

सिसी टिभी फुटेजका आधारमा शाहलेनै हत्या गरेको प्रहरीले अनुमान गरेको छ । सोही कारण अदालतले शाहलाई जमानतमा छाड्न समेत अस्विकार गरेको छ ।

प्रहरी अनुसन्धानका क्रममा बबीलाई भारतीय भनिएको छ । तर काठमाडौंमा जन्मिएको हुँदा नेपाल र भारत दुबै देशको नागरिकता भएको शंका समेत गरिएको छ ।