अमेरिका । सन् २०२३ मा करिब २१ हजार नेपाली स्थायी बसोबास अनुमतिपत्र (पिआर) लिएर अमेरिका आएका छन् । विदेश जाने बढ्दो क्रमसँगै पिआर पाउनेको संख्यामा पनि वृद्धि भएको हो ।

बिबिसी न्युज नेपालीले अध्यागमन विभागको तथ्यांक उद्दृत गर्दै दिएको समाचारअनुसार उक्त वर्ष ७१ हजार नेपालीले पिआर पाएर विश्वका विभिन्न १०९ देशतर्फ लागेका थिए । यसरी पिआर लिनेमध्ये ३६ हजार ६७२ पुरुष छन् । महिलाको संख्या ३४ हजार २६७ छ ।

जसमध्ये सबैभन्दा धेरै नेपालीले पिआर लिई गएको देश अमेरिका हो । दोस्रो नम्बरमा बेलायत छ । बेलायत र नर्दन आयरल्याण्डमा १६ हजार २ सय नेपालीले पिआर लिएर गएका थिए । तेस्रो नम्बरमा हङकङ आउँछ । त्यहाँ करिब ११ हजार नेपालीले गत वर्ष पिआर लिएर गएको तथ्यांक छ ।

अमेरिकामा यहाँको नागरिकता वा पिआर (ग्रिनकार्ड) लिएका नेपालीले आफ्ना परिवारका निकटलाई पिआरका लागि निवेदन दिन सक्छन् । अमेरिकाले डिभी चिठ्ठामार्फत पनि नेपालीलाई अमेरिका आउने मौका दिइरहेको छ । यही कारण अमेरिकाको पिआर पाएर आउने नेपालीको संख्या बढी भएको हो ।

अहिले अमेरिकामा नेपाली समुदायको जनसंख्या करिब चार लाख रहेको अनुमान छ । नेपाल बाहिर तेस्रो मुलुकमा सबैभन्दा बढी नेपालीको स्थायी बसोबास भएको देश पनि अमेरिका हो । अमेरिकामा ग्रिनकार्ड लिएको पाँच वर्षपछि यहाँको नागरिकताका लागि आवेदन दिन सकिन्छ ।

अध्यागन विभागले पहिलोपटक पिआर लिएर विदेश जानेको तथ्यांक राख्न सुरु गरेको छ । विभागका अनुसार गत वर्ष विदेश जाने नेपालीको संख्या १६ लाख ३ हजार छ । जसमध्ये दुई लाख चार हजार पर्यटकका रुपमा बाहिरिएका हुन् । पछिल्लो जनगणनाले २३ लाख नेपाली विदेशमा रहेको देखाएको छ । तर, धेरैले यो भन्दा धेरै बढी नेपाली विदेशमा बस्दै आएको दाबी गर्छन् ।

अस्ट्रेलियाले गत वर्ष करिब आठ हजारलाई पिआर दिएको तथ्यांक छ । अस्ट्रेलियामा केही वर्षयता नेपाली विद्यार्थी जाने क्रम तस्व्र दरले वृद्धि भइरहेको छ ।
उक्त अवधिमा जापानको पिआर पाएर २६ सय नेपाली त्यस देश गएको तथ्यांक छ । यसपछि क्यानडा, पोर्चुगल, जर्मनी, न्युजिल्याण्ड र युएईमा पिआर पाएर नेपाली गएका छन् ।

छिमेकी देश चीन र भारतमा पनि पिआर लिएर नेपाली जाने गरेको देखिन्छ । यो संख्या भने सानो छ । चीनमा १०६ जना नेपालीले पिआर लिएर गएको तथ्यांक छ ।

नेपालमा २० वर्षदेखि ४० वर्ष उमेर समूहका व्यक्तिमा विदेश जाने लहर नै चलेको छ । विदेश जाने नेपालीले पठाउने पैसा रेमिट्यान्सले देशको अर्थतन्त्रमा ठूलो प्रभाव पार्दै आएको छ । तर, यससँगै सामाजिक र आर्थिक समस्याहरु पनि देखिन थालेका छन् ।

सक्रिय उमेर समूहका व्यक्ति विदेश जाँदा बजार खुम्चिएको छ । गाउँघरमा युवाहरु कम भएका छन् । यसले केही सामाजिक समस्याहरु पनि ल्याएको छ ।

#तस्बिर : सामाजिक सञ्जाल