ड्यालस (अमेरिका) । गैर आवासीय नेपाली संघ अमेरिकामा यो पटक सदस्यताका लागि १३ हजार जनाको आवेदन परेको छ । यी मध्य सदस्यता छानवीन समितिले सोमबार रातिसम्ममा ८ हजार आठसयको सदस्यता आवेदनलाई स्विकृत गरिसकेको छ ।

दुई वर्ष अघि १७ हजार सदस्य रहेकोमा यस पटक घटेका छन् ।

एनआरएनए अमेरिकाका अध्यक्ष बुद्धी सुवेदीका अनुसार सदस्यता छानवीन समितिले उपलव्ध प्रमाणका आधारमा केही दिनभित्रै सदस्यता वितरण पुरा गरेर चुनावी कार्यक्रममा जाने तयारी गरिरहेको छ ।

अघिल्लो बर्षहरुको तुलनामा यसपटक सदस्यता लिने, चासो दिनेहरुको संख्या असाध्यै घटेको छ । विशेषगरि दुई वर्ष अघि न्यूयोर्कमा भएको एनआरएनए अमेरिकाको शपथग्रहण कार्यक्रममा हात हालाहालको अवस्था, तीनजना अध्यक्षको प्रावधानले यो संस्थाप्रति अमेरिकामा सर्वसाधारणमा वितृष्णा बढेको देखिन्छ ।

‘कठिन अवस्थामा पनि सदस्यता बन्नुहुने सबैलाई धन्यवाद छ । संस्थालाई सुधार गरेर लैजान सबैको योगदान र सहकार्य जरुरी छ’ सुवेदीले भने ।

एनआरएन अमेरिकामा दुईहजार चारसय ५७ जनाले पहिलेनै आजीवन सदस्यता लिइसकेका छन् ।

यसपटक सदस्यताको हिसाबले सबैभन्दा ठूलो च्याप्टर टेक्सस भएको छ । दुई वर्ष अघि तीनहजार सातसय ४१ सदस्य रहेको टेक्ससमा यसपटक भने दुईहजारले घटेको छ ।

सदस्यता छानवीन समितिले अन्तिम नामावली भने केही दिनमै सार्वजनिक गर्ने भएको छ ।