टेक्सास । वासिङ्टन डिसीस्थित नेपाली दूतावासले टेक्सासमा सञ्चालित कन्सुलर सेवा शिविरमार्फत नेपाली राहदानीलगायतका कागजातका लागि आवेदन दिएका सबैलाई नियमित प्रक्रियाअनुसार नै सेवा दिने भएको छ ।

उक्त शिविरवाट जम्मा भएको मनि अर्डर र क्यासियर चेक चोरी भएको थियो । यही कारण विभिन्न सेवाका लागि आवेदन दिएका आवेदकलाई दूतावासले उक्त मनी अर्डर र क्यासियर चेक रद्द गरी नयाँ पठाएर सहयोग गर्न आग्रह गरेको थियो ।

यो घटनाले उक्त शिविरमा आवेदन दिएका झण्डै ९३६ जनाले तोकिएको दस्तुर फेरि पठाउनु पर्ने हो कि होइन भन्ने अन्यौल भएको थियो । दूतावासका अनुसार उक्त घटनामा चोरी भएका क्यासियर चेक र मनि अर्डर रद्द गरी पुनः पैसा पठाएका वा नपठाएका सबैले सेवा पाउने छन् ।

मन्त्रिपरिषद्को निर्णयअनुसार सबैलाई सेवा दिन लागिएको दूतावासद्वारा बिहीबार जारी विज्ञप्तिमा उल्लेख छ । यो घटनाले सेवा प्राप्त गर्न केही ढिला भने हुन सक्ने बताइएको छ । मनि अर्डर र क्यासियर चेक पुनः पठाउनेको पैसा भने फिर्ता हुने छैन । यो सरकारी राजश्वमै जाने छ । जसले रद्द गरेर नयाँ पठाएनन् उनीहरुले पनि नियमित सेवा पाउने छन् ।

दूतावासका अनुसार उक्त कन्सुलर सेवा शिविरमा सेवा लिएका कुल ९३६ मध्ये ४३८ जनाले नयाँ मनि अर्डर र क्यासियर चेक पठाएका थिए । त्यहाँ आवेदन दिनेमध्ये २४० जनाको सेवाग्राहीको नयाँ राहदानी दूतावासमा प्राप्त भई सम्बन्धितलाई पठाउन सुरु गरिएको दुतावासले जनाएको छ ।

टेक्सासको ह्युस्टनमा खाना खानका लागि पार्किङमा गाडी रोकिएको बेला मनि अर्डर क्यासियर चेक चोरी भएको थियो । त्यसपछि दूतावास र त्यहाँको कर्मचारीप्रति विभिन्न प्रश्नहरु उठेका थिए । कतिले त्यहाँका कर्मचारीको मिलोमतोको आरोपसमेत लगाएका थिए । दूतावासमा कार्यरत परराष्ट्र मन्त्रालयका कर्मचारीको सम्पत्ति छानबिन गर्नुपर्नेसम्मका मागहरु भएका थिए ।

अमेरिकास्थित नेपाली दूतावासले जारी गरेको विज्ञप्ति :