काठमाडौँ । नेपालमा पछिल्लो २४ घन्टामा थप ३१६ जनामा कोरोना भाइरस सङ्क्रमण पुष्टि भएको छ । स्वास्थ्य तथा जनसङ्ख्या मन्त्रालयले गरेको नियमित पत्रकार सम्मेलनमा प्रवक्ता डा कृष्णप्रसाद पौडेलले बुधबार १२ हजार ७२७ मा कोरोना परीक्षण गर्दा ३१६ जनामा सङ्क्रमण पुष्टि भएको बताए ।  

 

उनका अनुसार सक्रिय सङ्क्रमित छ हजार ९५४ पुगेको छ । पछिल्लो समय थप २५९ जना सङक्रमणमुक्त भएको पौडेलले जानकारी दिए । योसँगै आठ लाख तीन हजार १६८ जना सङ्क्रमण मुक्त भएका छन् । 

 

पाँच सयभन्दा बढी सङ्क्रमण भएका जिल्ला काठमाडौँ र ललितपुर रहेका छन् । दुई सयभन्दा बढी सङ्क्रमित भएका जिल्लामा सुनसरी, धनुषा, भक्तपुर, कास्की, पूर्वनवलपरासी, बाँके र कैलाली रहेका छन् । 

 

यस्तै शून्य सङ्क्रमित भएका जिल्ला मनाङ, हुम्ला, सल्यान जाजरकोट र मुगु रहेका छन् । नेपालमा सङ्क्रमण दर १७.७ प्रतिशत रहेको छ । उनका अनुसार हाल होम आइसोलेसनमा छ हजार ६१०, संस्थागत आइसोलेसनमा ३४४, आइसियूमा १२० र भेन्टिलेटरमा ३७ जनाको उपचार हुँदैछ ।  

 

मन्त्रालयका प्रवक्ता डा पौडेलले पछिल्लो २४ घन्टामा कोरोनाबाट बुधबार थप तीन जनाको मृत्यु भएको जानकारी दिए । योसँगै कोरोनाबाट मृत्यु हुनेको सङ्ख्या ११ हजार ५२९ पुगेको छ । 

 

त्यसैगरी पछिल्लो समय दुई लाख २७ हजार ५८४ ले कोरोना भाइरसविरुद्धको खोप लगाएको उनले बताए । हालसम्म पहिलो मात्रा एक करोड ३० लाख ४०८ ले र पूर्ण मात्रा ८५ लाख १४ हजार ६८४ जनाले खोप लगाएका छन् । रासस