ड्यालस (अमेरिका) – अमेरिकामा आउँदो बुधबार रहेको कुकुर तिहारका अवसरमा नेपाली समुदायले टेक्ससको युलेस एनिमेल शेल्टरमा रहेका कुकुरहरुलाई पूजा गर्नुका साथै सहयोग हस्तान्तरण गर्ने भएका छन् ।
हालैमात्र युलेस सिटी काउन्सिलमा निर्वाचित सदस्य टिका पौडेलको पहल र नेपाली समाज टेक्सस समेतको आयोजनामा यो कार्यक्रम हुन लागेको हो । एनिमल सेल्टरमा असहाय, वेसहारा र मानिसहरुले छाडेका घरपालुवा जनावरहरुको पालन पोषण हुँदै आएको छ ।
तस्बिर : समाजिक संजाल
बुधबार बिहान ठीक १० बजे १५१७ वेस्टपार्क वे मा रहेको युलेस एनिमेल शेल्टरमा उपस्थित भएर कुकुर तिहार कार्यक्रममा सहभागिता जनाउनका लागि सिटी काउन्सिल मेम्बर पौडेलले आग्रह गरेका छन् । सिटीका मेयर लिण्डा मार्टिन लगायतका अमेरिकी तथा नेपाली समुदायका अग्रज कार्यक्रममा सहभागी हुनेछन् ।
घरपालुवा जनावरहरुको संरक्षणका लागि खुलेका एनिमल शेल्टरको बजेट सिटी (नगरपालिका) ले व्यहोर्दै आएको छ । उक्त कार्यक्रममा सहभागी हुन र कुकुरका लागि खानेकुराको व्यबस्थापन गर्न जिली मार्फत सहयोग गरिदिन समेत पौडेलले आव्हान गरेका छन् ।
नेपालीहरुले घरघरमा आफूले पालेका कुकुरलाई पूजा गर्दै आएपनि यसपटक शेल्टरका कुकुरका लागि सहयोग र पूजा आयोजना गरिएको भने यो पहिलो पटक हो ।
प्रतिक्रिया