मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

यो कथा होइन   

चर्चाबाट टाढा बस्न रुचाउने संगीत साधक

चर्चाबाट टाढा बस्न रुचाउने संगीत साधक

शेयर गर्नुहोस:

फन्ट परिवर्तन गर्नुहोस:

  • change font
  • change font
  • change font

नेपालीहरु मेहनती र इमान्दार छन् भनेर चिनिन्छन् । यस्तो मेहनत र इमानन्दारी विदेशमा पनि नेपाली सङ्गीत र साहित्यको क्षेत्रमा देखिन थालेको छ । यसको ताजा उदारण लोकप्रिय रियलिटी शो अमेरिकन आइडलमा दिवेश पोखरेल ( आर्थर गान ) को सहभागिता हो । हामी सबै संसारभरका नेपालीको लागि यो गौरव मान्ने कुरा पनि हो । तर कतिपय प्रतिभाशालीहरु अघाडि आउन चाहँदैनन् । उनिहरुसंग शीप छ , कला छ तर त्यसलाई आफूसंगै लुकाउन चाहन्छन् । त्यस्तै एकजना पात्र हुन् छिरिङ्ग लामा ।
टेक्सासको डालासमा एउटा सानो सभ्य काव्यिक जमघट थियो बितेको साता । डीएम राई (निर्मला ) को निम्तोमा यो पङतिकार पनि ह्युटनदेखि सहभागी थिएँ । छिरिङ्ग लामा र डीएम राई दुई दम्पतिको सौहाद्रपूर्ण आयोजनामा उनिहरुकै चिटिक्क परेको घरमा यो जमघट सुसम्पन्न भएको थियो ।
 
स्वादिलो भोजन र अर्थपूर्ण कार्यक्रमको तारीफ गर्दै हामी भगवतीजी , विनोद दाइ र म अन्तिम पाहुनाको रुपमा विदावारी हुँदै थियौं कि मेरा आँखाहरु मूलढोकाको दाहिने तर्फ सानो खुला कोठा जस्तोमा गएर टक्क अडियो । चारैतिर नजर घुमाए जताततै त्यो सानो कोठा बाजागाजाले भरिपूर्ण थियो । आश्चर्य ! ति बाजाका मौन तरङ्गले मलाई सम्मोहन गरे झैँ यस्तरी तान्यो कि बाहिर निस्किन लगाएको जुत्ता मैले एक झट्कामै फुकाले ।
 
सँगैको सोफामा गएर थचक्क बसें । अब छक्क पर्ने पालो अरु सबैको थियो । मैले समय खेर नफाली डीएम र छिरिङ्ग दुवैको पोज पोजको फोटो खिँचे। ति संगीतका वाद्य यन्त्रहरु माझमा राखेर । जब छिरिङ्गलाई छेवैमा बस्ने आग्रह गर्दै एक पछि अर्को प्रश्नहरु गर्न थाँले सबैले कुरा बुझिहाले।
 
रात भने छिप्पिदैं थियो । मैले भगवती र दाइलाई एकछिन त्यसको चिन्ता नगर्न आग्रह गरें । किनकि डालासमा मेरो बासस्थानको टुङ्गो उनिहरुकै घरमा लागेको थियो ।
आफ्नो समाज र समुदायको सांस्कृतिक कार्यक्रम र चाडपर्वहरुमा कहिलेकाहीँ लामाले आफ्नो प्रतिभा देखाउने गरेका छन् । निकै अघिदेखि टुङ्गनाको धुन बजाएर फेसबुकबाट धेरैलाई मन्त्रमुग्ध पारिसकेका छिरिङ्गले यो जमघटमा पनि दमदार प्रस्तुति दिएका थिए । टुङ्गनाको धुनमा गीत गाएर तालिको गडगडाहट बीच उनले ‘वान्स मोर’ पनि पाएका हुन् । त्यसदिन टुङ्गना , काव्यिक कार्यक्रमको विशेष आकर्षणको रुपमा रह्यो । निकै उत्साहका साथ सहभागीहरु यो बाजासँग घरीघरी फोटो खिच्दै थिए ।
 
अफिस जस्तो लाग्ने सानो कोठामा टुङ्गना , डंफु , मादल मेन्डोलियोन , बेन्जो , डिजेम्बे ( अफ्रीकन बाजा ) , बाँसुरी , गीतार लगायतका थुप्रै सङ्गीत साधनहरु थिए ।
कतिपय बाजाहरु नेपालबाट ल्याइएको कतिपय यहीं किनेको बताए लामाले ।
 
छिरिङ्ग लामालाई मैले सोधें – यी संगीतका साधनहरु प्रतिको लगावबारे केहि भन्नुहुन्छ ?
उनले भने – ” म सानो छँदादेखि म्युजिकप्रति आकर्षित थिएँ । गीतार बजाउँथे , काठको गीतार आफै बनाएर भए पनि बजाउँथे । कुनै गीतको भाव मन परेपछि बाजाको धुन बारम्बार बजाई रहन्थे । त्यो लतले मलाई आजसम्म छोडेको छैन । “
 
हो , उनको सङ्गीतप्रतिको प्रेम बुझ्न यी बाजाहरु नै काफी थिए । यी संगीतका साधक कतिपय बाजाहरुमा आफै तारहरु हालेर स्केल मिलाउँदा रहेछन् । डंफु र टुङ्गनाको यस्तै कथा उनले हामीलाई बताए ।
श्रीमती डीएम राईलाई बेला , बेलामा मिठो कविता फुर्नै , अनि श्रीमान बाजागाजा सहित गीत सङ्गीतमा रमाउने । यिनीहरुको जीवन कति रसीलो होला अनुमान लगाउन गाह्यो पर्दैन । पाँचथरकी डीएम र काभ्रेका छिरिङ्गको काठमाण्डौमा भेटघाट भएको थियो । सन १९९८ मा यी दुइले प्रेम विबहा गरे । साँच्चै यो प्रेमिल जोडीका कवि ह्रदय नियाल्दा अहा ! भन्न मन लाग्छ ।
 
यी दम्पतिका दुई छोरीहरु छन् । १९९८ मै अमेरिका आएका थिए लामा । डीएम भने सन २००२  मा आइन् अमेरिका । उनिहरुको यहाँ व्यवसाय छ । ग्यास स्टेशन र अटो बडी रिपेयरको । परिवारका साथ अमेरिकी जीवन राम्रै चलेको छ ।
 
वास्तवमा छिरिङ्गलाई तामाङ सोसाइटी अफ अमेरिका , डालस च्याप्टरका अध्यक्ष भनेर चिन्दछन् प्रायले । तर यिनी संगीतका होनहार साधक पनि हुन् भनेर कमैले चिनेका होलान् ।
उनी स्वयम स्विकार गर्दछन आफू लजालु स्वभावको छु भनेर । त्यसैले उनलाई एकांतमा संगीतसंग रमाउन नै आनन्द लाग्छ ।
” कला , साहित्य , संगीतले अपार खुशी दिन्छ , यो जीवनको बाँच्ने आधार हो । ” – लामा भन्छन् ।
 
एउटा अब्बल वाद्य वाधक लामा फुर्सद पायो कि संगीतमा भुल्छन् , बाजागाजामा हराउँछन् । उनी यसैमा लीन हुन चाहँन्छन् । चर्चा , परिचर्चा र प्रतिस्पर्धा भन्दा अलग रहेर ।
 
(यो कथा होइन – दुःख बाँड्दा घट्छ । सुख बाँड्दा बढ्छ । हामी मानिस मन शान्तिकोलागि प्रयत्नरत छौँ । गुम्सिनु दुःख हो, पीडा हो ।  प्रस्फुटन प्राप्ति र आनन्द । कुनै त्यस्ता घटना छन् जुन तपाईँ भित्र उकुसमुकुस भएर बसेका छन् । तपाईँको स्मरणमा बारम्बार आउने गर्छन् । रूवाउँछन् , हसाउँछन् ,  अचम्भित पार्दछन् । वा त्यस्तो घटना जसले तपाइको वा कसैको जीवन बदलेको छ । कसैको मन छुन सक्छ ।  कसैलाई मार्ग निर्देश गर्छ । हो यस्ता शतप्रतिशत सत्य घटनालाई हामीले ससम्मान प्रकाशित गर्ने जमर्को गरेका छौँ । आफ्ना मूल्यवान ती पलहरू बाँड्न तपाँईको अन्तरआत्मा सहमत हुन्छ भने हामीलाई सम्पर्क गर्नुहोस् ।  www.himalyakhabar.com / [email protected] )