मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

मेरो भोगाइको बेबी सावर

मेरो भोगाइको बेबी सावर


अघिल्लो साता एक सहकर्मीको बेबी सावरमा सहभागी तस्बीर देखेर मित्र रामचन्द्रजीले रमाइलो टिप्पणी गर्नुभयो । टिप्पणी कस्तो थियो भनेर यहाँ उल्लेख चाँही नगरैाँ । तर त्यो टिप्पणी निकै रमाइलो थियो । 
 
हिजोअाजका सप्ताहन्तका मेरा कुनै साँझ खाली छैनन् । जन्मोत्सव, ग्राजुएसन, वैवाहिक जीवनको बार्षिकोत्सवले सप्ताहन्तका कुनै साँझ खाली रहन दिँदैन । सोमबारदेखि शुक्रबारसम्मका साँझहरू काममा व्यस्त हुनुपर्छ । शनिबार र अाइतबारका साँझहरू यस्तै पार्टीमा व्यस्त । 
 
हुँदाहुँदा हिजोअाज नेपाली समुदायमा बेबी सावरको संस्कार बढेको छ । गर्भाधानदेखि मृत्युसम्म मानिसका १६ संस्कार हुने हिन्दु धर्मसंस्कारले उल्लेख गरेको छ । तर बेबी सावर हिन्दु संस्कारमा कहिँकतै उल्लेखित संस्कार होइन । तरपनि गर्भाधानदेखि जन्मको बीचमा गर्भाधानको अाठ महिना पुगेपछि बेबी सावर गर्ने संस्कार अमेरिकाका नेपाली समुदायमा असाध्यै बढेको छ । 
 
महिनामा बेबी सावर त कम्तिमा दुइवटा परिनै हाल्छन् । ‘भोली त फलानोकोमा बेबी सावर छ नि । याद छ नि हजुरलाइ ?‘ एक दिन अगावै धर्मपत्नीको अलार्म बज्छ । अनि उनी र दुइ छोरीलाइ अघि लगाएर लुरुलुरू जानुको विकल्प मसँग हुँदैन । कहिले निम्तालु भएर त कहिले पत्नीको ड्राइभर भएर म धेरै बेबी सावरमा सहभागी भएको छु । एकाध पटक पत्नीले अायोजना गरेको बेबी सावरमा सहअायोजकको भूमिका पनि मैले निर्वाह गर्नुपरेको छ । 
 
उल्लेख गरिहाले मेरा दुइ छोरीहरू छन् । दुबै स्कुल जाने उमेरका छन् । दुबै नेपालमा जन्मेका । 
 
हाम्रो पालामा यस्तो कहाँ थियो र ? शनिबारको दिन मेरी बहिनीहरू अकस्मात मेरो निवासमा आए । उनीहरूले 'हामी भाउजूलाई दहीचिउरा खुवाउन आएका' भन्दै ल्याएको खानेकुरा खुवाए। आफूले पनि खाइयो र नेपाली पररम्पराकै गर्भवतीलाई दहिचिउरा खुवाउने कार्यक्रम (बेबी सावर) मनाइयो, सक्कियो ।
 
दुवै पटक गर्भवतीको नियमित स्वास्थ्य परीक्षण गराइएको थियो । चिकित्सकले भने अनुसारका खानेकुरा र हेरचाह गरिएको थियो । तर चिकित्सकसँग गर्भमा छोरा छ कि छोरी छ भनेर हामीले कहिल्यै सोधेनौं । चिकित्सकले जानकारी दिन खोज्दा पनि 'हामीलाई आमा र बच्चा स्वस्थ भए पुग्छ' भन्दै उसको मुख बन्द गरायौं । गर्भको बच्चाको लिङ्ग नछुट्टिएपछि बेबी सावरमा कुन रंगको पोशाक लगाउने भन्ने कुरै सकियो । 
 
नेपालमा गर्भवतीहरू सकेसम्म पेट नदेखियोस् भनेर सतर्क हुन्थे । मेरी पत्नीले पनि त्यसै गरिन् । पेट देखाएर कहिल्यै फोटो खिचाइनन्/खिचाइएन ।
 
नेपाली संस्कारमा ८ महिना पुगेपछि माइती पक्षले घरमै गएर दहीचिउरा खुवाउने चलन चल्दै अाएको थियो । तर अहिले कतिले घरमै त कतिले रेष्टुँरामा बेबी सावर गर्दै अाएको देखिन्छ । विशेषगरि बेबी सावर चाँहि गर्भवती महिलाका साथी, निकट अाफन्त र शुभेच्छुकहरूले गर्ने चलन रहेछ । जुन तथ्य अाफैँ धेरैपटक अरूकोमा सहभागी भएर र एक पटक सहअायोजक हुँदा पत्तो पाइयो । 
 
अब रह्यो कुरो कमेन्ट गरिएको तस्वीरको । सहकर्मीको बेबी सावरका लागि भन्दै सहकर्मी अफ्रिकी मूलका महिलाहरू रकम उठाउँदै आए । नेपाली महिला सहकर्मीसँग बुझ्दा यो कार्य 'हामी आयोजना गर्छौं' भनेर उनीहरूले भनेका रहेछन् । निर्धारित रकम बुझाएर सहकर्मीहरूले आयोजना गरेको बेबी सावरमा सहभागी बनियो। साथीहरू जम्मा भएर फोटो खिच्दा आफू पनि बसियो । 
 
बेबी सावर कल्चर एउटा अभिन्न पाटोका रूपमा नेपाली समुदायमा भित्रिइसकेको छ । गर्भमा छोरा छ कि छोरी भन्ने कुरा पहिल्यै जानकारी लिएर त्यसै अनुसारका ड्रेसअप गरेर म धेरै पटक सहभागी भएको छु । छोरी रहेछ भने पिङ्क कलर र छोरा हुँदा निलो कलरको कपडा लगाउनुपर्ने नियम अायोजकको हुन्छ । 
 
महिला, केटाकेटीहरूलाइ त बेबी सावर रमाइलै महसुस गरेको मैले धेरै पटक देखेको छु । तर मलाइ भने सबैभन्दा अप्ठेरो महसुस हुन्छ । खेलका नाममा बेलुन फुटाउनेदेखि लिएर अनेकथरिका कार्यले अाफैँलाइ लाज लाग्छ । तरपनि सहभागी हुनैपर्यो । नभए सामाजीक बहिष्कारमा परिएला भन्ने डर । 
 
म मात्र होइन । धेरै पुरूषहरू मन लागि नलागी बेबी सावरमा पुग्न वाध्य भएको पनि धेरै पटक देखेको छु । 
 
प्रि बेबी सावरको अर्को रमाइलो सन्दर्भ पनि मैले भोगेको छु । एक जनाको गर्भमा छोरा रहेछ भन्ने निधो भयो । सामान्यतया १२ हप्ताको गर्भ भएपछि छोरा या छोरी के छ भन्ने निश्चित हुन्छ । यही अवधिमा स्वास्थ जाँच हुँदा छोरा रहेको जानकारी भएको अवसरमा पनि एउटा कार्यक्रम अायोजना भयो । जहाँ निलो जुत्ता लुकाएर राखिएको थियो । जुत्ता सार्वजनिक भएपछि छोरा रहेको सहभागी सबैले जानकारी पाएका थिए ।