काठमाडौँ । राष्ट्रिय स्वतन्त्र पार्टी (रास्वपा) का सांसद यज्ञमणि न्यौपानेले भ्रष्टाचार तथा अवैधरूपमा सञ्चित भएको भनिएको रकम बैंकिङ प्रणालीमा ल्याउन नोटबन्दी गर्न सरकारसमक्ष प्रस्ताव गरेका छन् ।

प्रतिनिधि सभाको बैठकमा बोल्दै सांसद न्यौपानेले लामो समयदेखि भ्रष्टाचारबाट आर्जित भएको दाबी गरिएको रकम विभिन्न माध्यमबाट लुकाइएको उल्लेख गर्दै त्यसलाई वित्तीय प्रणालीमा ल्याउन पुराना नोट विस्थापन गर्नुपर्ने धारणा राखे।

उनले देश लुटेर सञ्चित गरिएको भनिएको कालोधनकै कारण केही व्यक्तिले राजनीतिक तथा अन्य क्षेत्रमा प्रभाव विस्तार गरेको दाबी गरे। त्यस्तो रकम देशविरुद्ध हुने गतिविधिमा समेत प्रयोग हुनसक्ने भन्दै सरकारले त्यसको व्यवस्थापनका लागि तत्काल कदम चाल्नुपर्ने उनको भनाइ थियो।

“३५ वर्षदेखि देश लुटेकाहरूले राखेको कालो धनका कारण आज उनीहरूले शक्ति प्राप्त भयो,” उनले संसदमा भने।

न्यौपानेले आवश्यक परे नयाँ नोटसमेत प्रचलनमा ल्याएर पुराना नोट विस्थापन गर्नुपर्ने प्रस्ताव गरे। भ्रष्टाचारबाट आर्जित रकम लुकाएर राखिएको भए त्यसलाई निष्क्रिय बनाउने उद्देश्यले नोटबन्दीको निर्णय लिनुपर्ने उनको तर्क थियो।

भारतमा विगतमा उच्च दरका नोट बन्द गरिएको उदाहरण प्रस्तुत गर्दै उहाँले नेपालले पनि त्यसबाट सिक्नुपर्ने धारणा राखे।

सांसद न्यौपानेको प्रस्तावलगत्तै नेपाली कम्युनिस्ट पार्टीका प्रमुख सचेतक युवराज दुलालले उक्त प्रस्तावप्रति समर्थन जनाए। उनले रास्वपाको नेतृत्वमा रहेको सरकारसँग तत्काल पुराना एक हजार र पाँच सय रुपैयाँका नोट बन्द गर्न माग गरे।

दुलालले भ्रष्टाचारबाट आर्जित रकमका रूपमा राखिएको भनिएका त्यस्ता नोटको कारोबार रोक्न सरकारले तत्काल निर्णय लिनुपर्ने बताए। यस विषयमा नेपाली कम्युनिस्ट पार्टीका सांसदहरूको हस्ताक्षर आवश्यक परे उपलब्ध गराउने उनले घोषणा गरे।

“उहाँले राखेको प्रस्तावमा पूर्ण समर्थन गर्दै रास्वपाको सरकारलाई अविलम्ब पुराना हजार र ५०० का नोटहरूलाई नोटबन्दी गर्न जोडदार रूपमा सरकारसँग माग गर्दछु,” दुलालले भने।

उनले नोटबन्दीको निर्णय लिन सरकारलाई के कुराले रोकिरहेको भन्दै प्रश्नसमेत गरे। साथै, उक्त विषयमा सभामुखबाट आवश्यक रुलिङ हुनुपर्ने माग उनले बैठकमा राखेका छन् ।