बस्टन (अमेरिका)- अमेरिकी अनुमान बजार पोलिमार्केटले नेपाल शिर्षकमा मात्रै ११ वटा बाजीको खाल थापेको छ । गत महिना नेपालको आगामी आम निर्वाचनमा कुन दलले चुनाव जित्ला भनेर बाजी थापेको पोलिमार्केटले हालै नेपालको प्रधानमन्त्री को बन्ने छ भन्ने विषयमा पनि बाजी थापेको छ ।

आज सोमबार फेबूुअरी १६ मा मात्रै थापेको यो बाजी नेपालको चुनावको विषयमा थापिएका बाजीहरुमध्ये सर्वाधिक चर्चित र लोकप्रिय बनेको छ । जसमा केही घण्टा मैं यो समाचार लेखेको समय सोमबार साँझ ८ बजेर ५० मिनेटा जाँदासम्ममा दुइ लाख ३६ हजार डलर बराबरको बाजी कन्ट्रयाक्ट खरिद गरेका छन् ।

यो बाजी अनुसार बालेन्द्र शाह प्रधानमन्त्री बन्ने सम्भावना ६१ प्रतिशत रहेको तत्कालको तथ्यांक(रियलटाइम एल्गोरिदम)ले देखाएको छ । त्यसैगरी दोस्रो स्थानमा गगनकुमार थापा प्रधानमन्त्री बन्ने सम्भावना रहेको पोलिमार्केटको प्रडिक्सनले देखाएको छ । अचम्म लाग्दो कुरा त के छ भने को प्रधानमन्त्री बन्ला भन्ने शिर्षकको यो बाजीमा बालेन पहिलो हुनेछन् भनेर मात्रै २ लाख चौंतिसहजार डलर रकम जम्मा भइसकेको छ ।

पोलिमार्केटल गत महिना राखेको कुन पार्टी पहिलो दल बन्छ राखेको बाजीमा समेत हालसम्म ७० हजार डलर बराबरको रकम खालमा परेको छ । उक्त बाजीमा रास्वपा पहिलो दल बन्छ भन्नेमा ६७ प्रतिशत सम्भावना र नेपाली कांग्रेस पहिलो दल बन्ने सम्भावना २६ प्रतिशत रहेको देखिएको छ ।

बालेनसँग झापामा प्रतिस्पर्धा गरिरहेका पूर्व प्रधानमन्त्री केपी शर्मा वली प्रधानमन्त्री बन्ने सम्भावना जम्मा १४ प्रतिशत र रास्वपाका सभापति स्वयं रवि लामिाछाने प्रधानमन्त्री बन्ने सम्भावना १० प्रतिशत देखिएको छ ।

त्यसैगरी प्रचण्ड, कुलमान घिसिंग, हर्क साम्पांग र माधवकुमार नेपाल र सुसिला कार्की चुनावपछि प्रधानमन्त्री बन्ने सम्भावना न्यून अर्थात २ प्रतिशत मात्र देखाएको छ ।

त्यसैगरी पोलिमार्केटले दोस्रो स्थान र तेस्रो स्थानका लागि छुट्टा छुट्टै बाजी खोलेपनि त्यसमा बाजी खरिदकर्ताहरु आकर्षित देखिंदैनन् ।

स्कटल्याण्ड भर्सेस नेपाल टि ट्वान्टी क्रिकेटको पनि पोलिमार्केटमा बाजी जारी छ । जसमा स्कटल्याण्डले नेपाललाई हराउने सम्भावना ६३ प्रतिशत रहेको देखिन्छ । नेपालको महिला क्रिकेटको पनि पोलिमार्केटमा बाजीका शिर्षक देखिएका छन् । ति बाजीहरुमा नेपालले जित्ने सम्भावना १ प्रतिशत भन्दा कम देखिएको छ ।