काठमाडौँ । शृङ्खलाबद्ध हत्या तथा लुटपाट गर्ने गिरोहलाई प्रहरीले पक्राउ गरी आज सार्वजनिक गरेको छ ।

नेपाल प्रहरीको केन्द्रीय अनुसन्धान ब्यूरो ९सिआइबी० समेतको संलग्नतामा अनुसन्धान तथा खोज अभियानका क्रममा यसरी व्यक्ति हत्या र लुटपाटमा संलग्न चार जनालाई पक्राउ गरिएको ब्यूरोका प्रवक्ता, प्रहरी वरिष्ठ उपरीक्षक शिवकुमार श्रेष्ठले जानकारी दिए ।

पक्राउ पर्नेमा ओखलढुङ्गाका २८ वर्षीय मिलन भन्ने सङ्गम राई, सोही जिल्लाका ३० वर्षीय विनोद राई, ३० वर्षीय प्रकाश भुजेल र ३० वर्षीय दोर्जे भन्ने अशोक भुजेल रहेका छन् ।

उनका अनुसार ती गिरोहले यही पुस १५ गते ओखलढुङ्गा चिशङ्खुगढी गाउँपालिका–६, भदौरे गैरीगाउँस्थित शोभितमान किराना पसल सञ्चालन गरी बस्ने ६० वर्षीय शोभितमान थापा मगर र निजकी श्रीमती ६० वर्षीया रत्नमाया थापा मगरको हत्या गरी लुटपाट गरेका थिए ।

उनीहरुले पसल तथा कोठामा रहेको अन्दाजी रु एक लाख नगद तथा दुई तोला सुनको गरगहना र छ तोला काँचो सुनसमेत लुटपाट गरी लगेका थिए ।

उक्त घटनापछि नेपाल प्रहरी प्रधान कार्यालय, केन्द्रीय अनुसन्धान ब्यूरो, कोशी प्रदेश प्रहरी कार्यालय, विराटनगर र जिल्ला प्रहरी कार्यालय, ओखलढुङ्गाबाट खटिएको संयुक्त अनुसन्धान टोलीले अनुसन्धानपश्चात् उक्त घटनामा संलग्न रहेको पाइएपछि उनीहरुलाई पक्राउ गरिएको श्रेष्ठले बताए ।

पक्राउ गरी प्रारम्भिक सोधपुछ गर्दा उनीहरुले गत असोज २६ गते राति ओखलढुङ्गा सिद्धिचरण नगरपालिका–४ चार्खुमा एकल महिला ५२ वर्षीया रत्नकुमारी कटवाल (कार्की)को वीभत्स हत्या गरी नगद तथा सुनका गरगहनासमेत लुटपाट गरेको पाइएको छ ।

उनीहरुका साथबाट हत्यामा प्रयोग भएको बन्चरो, लुटिएको सुन, गरगहना, खुकुरी, पसलबाट लुटिएको रिचार्ज कार्ड, दुई नाल भरुवा बन्दुक र चारवटा मोबाइल बरामद गरिएको छ । उक्त घटनाको थप अनुसन्धान भइरहेको ब्यूरोले आज सार्वजनिक गरेको विवरणमा उल्लेख छ ।