मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

मनोरञ्जन   
मुख्य समाचार   

न्यूयोर्कमा बृहत् आदिवासी जनजाति सांस्कृतिक साँझ

न्यूयोर्कमा बृहत् आदिवासी जनजाति सांस्कृतिक साँझ


शेयर गर्नुहोस:

594
Shares

  • change font
  • change font
  • change font

न्यूयोर्क । नेपालका विभिन्न आदिवासी जनजातिहरुले अमेरिकाको न्यूयोर्कमा आफ्नो मौलिक संस्कृति प्रस्तुत गरेका छन् । न्यूयोर्कको उडसाइडमा नेपाल आदिवासी जनजाति महासंघ (फिप्ना) अमेरिकाले शुक्रबार आयोजना गरेको बृहत् आदिवासी जनजाति सांस्कृतिक साँझमा १८ वटा आदिवासी जनजातिहरुले आफ्नो मौलिक संस्कृति र नृत्य प्रस्तुत गरेका हुन् ।

डम्फु र टुंगना बजाउँदै तामाङ सेलो र डोलक बजाउँदै नाचिएको सोई ढोले सोईले नेपालको सांस्कृतिक विविधतालाई अमेरिकामा जीवन्त बनाएको थियो । त्यस्तै, कुमारी नाँच, शेर्पा नाँच सँगै मगर संस्कृति झल्कीने नृत्यले कार्यक्रमलाई रोचक बनाएको थियो । कार्यक्रममा सहभागीहरु आआफ्नो मौलिक भेषभूषामा उपस्थित भएका थिए ।

औपचारिक कार्यक्रमभन्दा फरक शैलीमा गरिएको सांस्कृतिक साँझमा देखाइएको प्रस्तुतिलाई नेपाली एवं अमेरिकी सहभागीहरुले निकै रुचिका साथ अवलोकन गरेका थिए ।

सन् २००५ मा स्थापना भएको नेपाल आदिवासी जनजाति महासंघ न्यूयोर्कको सबैभन्दा ठूलो नेपाली संस्थाको रुपमा रहेको छ । जसले १८ वटा विभिन्न जातीय संस्थाहरुलाई आफ्नो छातामुनि राखेको छ । ग्लोबल जनजाति महासंघको नाममा गठन भएको यो संस्था सन् २००७ मा नेपाल आदिवासी जनजाति महासंघ बनेको हो ।

महासंघले नेपालको कला, संस्कृति, भेषभूषा, परम्परा र भाषा संरक्षण, सम्वर्द्धन एवं पुस्तान्तरणमा महत्त्वपूर्ण योगदान दिदै आएको छ भने नेपालमा विभिन्न परिस्थितिमा सहयोग गरिरहेको छ ।

महासंघले गतवर्षदेखि बृहत् आदिवासी जनजाति सांस्कृतिक साँझ गर्न सुरू गरेको हो । कार्यक्रममा फिप्नामा आवद्ध सबै संस्थाहरुले छुट्टै पहिचानसहितको प्रस्तुति दिएका थिए । फिप्नाका अध्यक्ष तोरण गुरूङको अध्यक्षतामा सञ्चालन भएको सांस्कृतिक साँझको समन्वय एवं व्यवस्थापन महासचिव दीपक चौधरीले गरेका थिए ।

कार्यक्रममा न्यूयोर्क महानगरका स्थानीय प्रतिनिधिहरुको पनि उपस्थिति रहेको थियो । फिप्नालाई न्यूयोर्क महानगर डिस्टीक ३० का काउन्सिल म्यान रोबर्ट होल्डेनले सर्टिफिकेट अफ रिकग्निसन हस्तान्तरण गरेका थिए ।

फिप्नाका अध्यक्ष गुरूङले अमेरिकामा रहे पनि आफ्नो भाषा, संस्कृति र परम्परालाई निरन्तरता दिने भन्दै दोस्रो पुस्तालाई पनि आफ्नो संस्कृतिप्रति गर्व गर्ने वातावरण बनाउने दाबी गरे । उनले भाषा, संस्कृतिको पुस्तान्तरण अहिलेको चुनौती भएकाले त्यसका लागि फिप्ना यस्ता कार्यक्रमहरुलाई निरन्तरता दिने बताए ।

त्यस्तै, महासचिव दीपक चौधरीले सम्पूर्ण संघसंस्थाहरुलाई अझै सक्रिय भएर लाग्न आग्रह गर्दै त्यसको नेतृत्वका लागि फिप्ना सधैँ तयार रहेको बताए । उनले कार्यक्रमलाई सभ्य र भब्य बनाउन साथ दिने स्थानीय संघसंस्था एवं फिप्नाका सदस्य संस्थाहरुलाई विशेष धन्यवाद ज्ञापन गरे ।

फिप्नाका वरिष्ठ उपाध्यक्ष पेमा लामाले स्वागत गरेको कार्यक्रमको समापनमा कलाकार एवं प्रायोजकहरुलाई सम्मानपत्र प्रदान गरिएको थियो । कार्यक्रम समापन गर्दै अध्यक्ष गुरूङले जुलाई ९ मा न्यूयोर्कमा आदिवासी जनजाति दिवसको आयोजना गरिएको र यो दिवसलाई ऐतिहासिक बनाउन सबैलाई आग्रह गरे ।

शेयर गर्नुहोस:

594
Shares