काठमाडौँ । गायक प्रमोद खरेलले लामो समयपश्चात् डान्सिङ नम्बरको गीत ल्याएका छन् । उनले आफ्नो ‘प्रमोद खरेल एण्ड परम्परा’ ब्याण्ड कन्सर्टका लागि नेपाल टुरमा निस्किनुअघि सोमबार नयाँ गीत ‘लै लै लै’ सार्वजनिक गरेका हुन् ।

गीतको शब्द तथा सङ्गीत कृष्ण केसी र एरेन्ज योगेश काजीले गरेका हुन् । भिडियोमा पल शाह र जुना विश्वकर्मा फिचर्ड भएका छन् भने प्रमोदको स्पेशल अपिरियन्स देख्न पाइन्छ । गीतमा आफूले मन पराएकी युवतीको खुलेर बयान गरिएको छ । गीतका टुक्का भिडियो सार्वजनिकअघि नै टिकटकमा चर्चित भैसकेका छन् ।

प्रमोदले ‘ओए… झुमा झुम्कावाली’, ‘यो कुरा गोप्य’पछि डान्सिङ नम्बरको गीत ल्याएका थिएनन् । ‘लै लै लै’ सार्वजनिक भएसँगै हिमालयखबरसँग उनले भने, ‘अन्य गीतहरू आइरहे पनि यो प्याटनका गीत धेरै ग्याप भएको थियो । कन्सर्टमा जाँदा अडियन्सबाट पनि त्यो खालको कुनै नयाँ गीत सुन्न पाए भन्ने फिडब्याक पाउँथेँ।’

आफूले स्रोता र दर्शकको सुझावको आधारमा पनि काम गर्दै आएको र ‘लै लै लै’ त्यस्तै एउटा गीत भएको उनले बताए । उनले गीतले माया पाउने विश्वाससमेत व्यक्त गरेका छन् ।

प्रस्तुत गीतको भिडियो निर्देशन शान थापाले गरेका छन् । यसमा रोशन विश्वकर्माको कोरियोग्राफी, अर्जुन तिवारीको छायाङ्कन र विवेक सुनारले सम्पादन गरेका छन् ।

गायक प्रमोद पछिल्लो समय आफ्नो ब्यान्डसँग कन्सर्टमा व्यस्त बनिरहेका छन् । ‘प्रमोद खरेल एण्ड परम्परा’ ब्याण्डले भ्यालेन्टाइनमा चितवनको सौराहामा कन्सर्ट गर्दैछ ।