बाकु (अजरबैजान) । राष्ट्रपति रामचन्द्र पौडेलले अहिले विश्वको मुख्य समस्या नै जलवायु परिवर्तन रहेको बताएका छन् । अजरबैजानको बाकुमा जलवायु परिवर्तनसम्बन्धी संयुक्त राष्ट्र संघीय संरचना महासन्धि पक्ष राष्ट्रहरूको २९ औँ सम्मेलन (कोप–२९) मा भाग लिन सोमबार त्यहाँ पुगेका राष्ट्रपति पौडेलले यस्तो बताएका हुन् ।

बाकुस्थित हैदर अलीएभ अन्तर्राष्ट्रिय विमानस्थलमा अजरबैजानका न्यायमन्त्री फरिद अहमदोले राष्ट्रपति पौडेललाई स्वागत गरेका थिए ।

स्वागत र त्यसपछि कुराकानीका दौरान राष्ट्रपति पौडेलले अहिलेको विश्वको समस्या नै जलवायु परिवर्तन भएको र यो सम्मेलनले विकसित देशलाई कार्बन उत्सर्जन कम गर्न महत्त्वपूर्ण भूमिका खेल्नुपर्ने बताए । उनले जलवायु कोषमा प्रतिबद्धता प्रकट गरेको रकम लगानी गर्न तथा कार्बन उत्सर्जनमा न्यून योगदान गरेर पनि मारमा परेका विकासोन्मुख देशका लागि लगानी गर्न प्रेरित गर्नुपर्ने उल्लेख गरेको राष्ट्रपतिका प्रेस सल्लाहकार किरण पोखरेलले जानकारी दिए ।

पोखरेलले मन्त्री अहमदोले अहिलेको सम्मेलनको मुख्य विषय नै त्यही भएको उल्लेख गर्दै विकासोन्मुख देशमाथि न्याय गरिनुपर्ने उल्लेख गरेको जानकारी दिए । उनले अजरवैजानमा नेपालका जस्ता पहाड नभए पनि हिमाल पग्लिएर पानीको स्रोत सुकेको जानकारी दिएका थिए ।

मंगलबारबाट सुरु हुने कोप-२९ मा उच्चस्तरीय नेपाली प्रतिनिधिमण्डलको नेतृत्व गर्दै राष्ट्रपति पौडेल कतारको दोहा हुँदै बाकु पुगेका हुन् । सो भ्रमण दलमा प्रथम महिला सबिता पौडेल, वन तथा वातारण मन्त्री ऐनबहादुर शाही, राष्ट्रपतिका विज्ञ सल्लाहकारसहित नेपाल सरकारका उच्च पदस्थ अधिकारीहरूको सहभागिता रहेको छ ।

कोप-२९ अर्न्तगतको सम्मेलनमा राष्ट्रपति पौडेलले उच्चस्तरीय सत्रको ‘विश्व नेताहरू जलवायु कार्य शिखर सम्मेलन’लाई सम्बोधन गर्ने कार्यक्रम छ । सम्मेलनका क्रममा नेपालले आफ्ना एजेण्डामाथि विश्वको ध्यानाकर्षण गराउन कात्तिक २८ गते राष्ट्रपति पौडेलको नेतृत्वमा बेग्लै उच्चस्तरीय सत्र सञ्चालन हुनेछ ।

यही कात्तिक २६ गतेबाट शुरु हुने सम्मेलन आगामी मंसिर ७ गतेसम्म चल्नेछ । राष्ट्रपति पौडेल कात्तिक ३० गते स्वदेश फर्कने कार्यतालिका छ ।