टेक्सस (अमेरिका) । नेपाली समाज टेक्ससद्वारा सञ्चालित ‘एनएसटी ग्लोबल पाठशाला’ को समर क्याम्प आउँदो साताबाट सुरू हुने भएको छ ।

आउँदो जुलाई १५ देखि २८ सम्म पाठशालाको समर क्याम्प हुने नेपाली समाज टेक्ससका अध्यक्ष राजेन्द्र वाग्लेले जानकारी दिए । यो समर क्याम्पलाई नेपाली समाज टेक्ससले ‘सांस्कृतिक तथा आध्यात्मिक समर क्याम्प’ नाम दिइएको छ ।

हरेक वर्ष समर सिजनको स्कुल छुट्टीको समयमा नेपाली समाज टेक्ससले स्कुल जाने उमेरका बालबालिकाहरुलाई हिन्दु धर्म, संस्कार, संस्कृति, नैतिक शिक्षाका बारेमा जानकारी दिन समर क्याम्प आयोजना गर्दै आएको छ । सदाझैँ यस वर्ष पनि डा. चिन्तामणि योगीले बालबालिकाहरुलाई कक्षा लिने भएका छन् ।

समर क्याम्पमा भर्ना हुनका लागि ५ वर्ष उमेर पुगेको हुनुपर्नेछ । यसपटक ५ वर्षदेखि ९ वर्षसम्म उमेरका बालबालिकालाई छुट्टै र ९ वर्षदेखि माथिका बालबालिकाहरुको अलग्गै समूह बनाएर पढाइने नेपाली समाजले जनाएको छ ।

आध्यात्मिक र सांस्कृतिकका अतिरिक्त बालबालिकाहरुका लागि योग मेडिटेसन, कन्फिडेन्स अभिवृद्धि, चित्रकला, नृत्य र नाटक, आर्थिक पक्षमा समेत सिकाइने गरी पाठ्यक्रम विकास गरिएको छ । जुनियर बालबालिकाका लागि जुलाई १५ देखि २१ सम्म र सिनियरका लागि जुलाई २२ देखि २८ सम्म कक्षा हुनेछन् ।

नेपाली समाजले तयार गरेको कार्यतालिकाअनुसार हरेक दिन बिहान ८ बजे कक्षा सुरू हुने र दिउँसो ४ बजे समापन हुनेछ । त्यसबीचमा बालबालिकाहरुका लागि ब्रेकफाष्ट, लञ्चलगायत सबै कुराहरु प्रदान गरिनेछ । समर क्याम्प युलेसस्थित पशुपतिनाथ तथा बुद्ध मन्दिरमा हुनेछ ।