बिर्तामोड, झापा । छैटौं झापा गोल्डकप प्रतियोगिताको मुख्य सहप्रायोजक अन्तर्राष्ट्रिय झापाली समाज हुने भएको छ । हिजो यहाँ आयोजित एक कार्यक्रममा समाजका अध्यक्ष मुकुन्द ढुंगाना र झापा गोल्डकपका अध्यक्ष विनोद बस्नेतले एमओयुमा हस्ताक्षर गरे ।

अन्तर्राष्ट्रिय झापाली समाजले उक्त नकआउट प्रतियोगिताको दोश्रो पुरस्कारको लागि सातलाख रुपैयाँ उपलब्ध गराउने सम्झौता भएको छ ।

प्रतियोगिता यही फागुन १९ गतेबाट शुरु हुनेछ । प्रतियोगिताको फाइनल खेल फागुन २९ गते खेलाइनेछ । सो प्रतियोगितामा नेपालका अधिकांश राष्ट्रिय टीमले भाग लिएका छन् ।

छैटौं झापा गोल्डकप प्रतिगोगिताको सहप्रायोजन गर्ने अवसर पाएकोमा अन्तर्राष्ट्रिय झापाली समाजका अध्यक्ष मुकुन्द ढुंगानाले खुशी व्यक्त गर्दै प्रतियोगिताको सफलताको कामना गरे । उक्त अवसरमा झापा गोल्डकपका अध्यक्ष विनोद बस्नेतले सहप्रायोजनको जिम्मेवारी लिएर झापाली समाजले अत्यन्त सह्राहनीय काम गरेकोमा धन्यवाद दिए ।

स्मरण रहोस, अन्तर्राष्ट्रिय झापाली समाजले झापाको सामाजिक , शैक्षिक , खेलकुद लगायत विविध क्षेत्रको विकासमा उल्लेख्य योगदान गरिरहेको छ ।