अमेरिका । टेक्ससमा भर्खरै आयोजित एक सावर्जनिक कार्यक्रममा गैरआवासीय नेपाली संघ (एनआरएनए)का पदाधिकारी पनि सहभागी थिए । तर, कार्यक्रम आयोजकले उनलाई बेवास्ता गरे ।

यहाँ मात्र होइन, अमेरिकामा हुने सार्वजनिक कार्यक्रममा एनआरएन अमेरिका र आइसिसीका पदाधिकारीलाई खासै महत्त्व दिन छाडिएको छ । तीन चिरामा बाँडिएको एनआरएनए प्रति धेरैमा वितृष्णा छ । विदेशमा बस्ने कैयौँ नेपालीहरु एनआरएनएप्रति टाढिँदै गएका छन् ।

कतिले त एनआरएनए विदेशमा बस्ने नेपालीका लागि घोडा बन्दै गएको बताउनसमेत थालेका छन् । एनआरएनएले गर्दा नै विदेशमा बस्ने नेपालीका मुद्दा सही रुपमा राख्न नसकिएको गुनासा गर्नेहरु छन् ।

एनआरएनए संस्था अहिले तीन चिरा परेको छ । केही महिनाअघि काठमाडौँमा भएको एनआरएनए निर्वाचनको नतिजा स्वीकार्ने एनआरएनए र नस्वीकार्ने एनआरएनएले गर्दा नेपाल सरकार परराष्ट्र मन्त्रालयले संस्थाको नवीकरण गर्नसमेत ढिलाइ गरिरहेको छ । दुई वर्षअघि गठन भएको अर्को एनआरएनए पनि अस्तित्वमा छ ।

एनआरएनए संस्थामा आएका एकपछि अर्को विवादले नेपालका राजनीतिक पार्टीका मुख्य नेताहरुले समेत यहाँका पदाधिकारीसँग दूरी बनाउन थालेका छन् । नेपाली कांग्रेसका महासचिव गगन थापाले दुई वर्षयता एनआरएनएप्रति चासो कम देखाउन थालेका छन् । एक वर्षअघि उनलाई एनआरएनएको अमेरिकामा हुन लागेको एउटा कार्यक्रममा मुख्य अतिथिका रुपमा निमन्त्रणा गरिएको थियो । तर, उनी आएनन् ।

नेपाली कांग्रेसका उपसभापति तथा उपप्रधानमन्त्री पुर्णबहादुर खड्का पनि एनआरएनएप्रति खुशी छैनन् । माओवादीका नेता जनार्दन शर्माले पनि एनआरएनएको अहिलेको अवस्थाप्रति बेखुसी व्यक्त गरेका थिए ।

अहिले तीनै वटा एनआरएनएएले आफ्नानिकटलाई विभिन्न पदमा राखेको, नियुक्त गरेको सामाजिक सञ्जालमार्फत जानकारी दिँदै आएका छन् । उनीहरुले देखिने गरी गर्ने काम यही हो ।

नेपालको नागरिक समाज र मिडियाले पनि एनआरएनएलाई बेवास्ता गर्न थालेका छन् । एनआएनएले गरेका नियुक्ति, प्रेस विज्ञप्तिहरुलाई स्थान दिन छाडेका छन् ।

विगतमा ल्याइएका कयौँ योजना र कार्यक्रम लथालिङग हुँदै गएकाले पनि मिडियाले पत्याउन छाडेका हुन् । चुनाव स्वीकार्ने समूहले आफ्ना निकटलाई सल्लाहकारलगायत विभिन्न पदमा नियुक्त गरेको केही दिनपछि चुनाव नस्वीकार्ने समूहले पनि यस्तै गर्‍यो । यो क्रम अझै चलिरहेको छ ।

केही वर्षअघि घोषणा गरिएको एनआरएनए लगानी कोष अहिले बन्द हुने अवस्थामा पुगेको छ । यो कोषमा सरकारले पनि ५० करोड रुपैयाँ राखेर सहभागी हुने निर्णय भएको थियो । तर, संस्थाको नवीकरणसमेत नभएको अवस्थामा सरकार र विदेशमा बस्ने नेपालीले पैसा राख्ने संभावना कम हुँदै गएको छ ।

एनआरएन नागरिकतालाई ठूलो उपलब्धिका रुपमा लिइएको भए पनि यसमा पनि समस्याहरु देखिएका छन् । एनआरएन नागरिकता लिएर नेपाल जाँदा पनि शुल्क तिरेर भिसा लिनुपर्ने अवस्था छ । एनआरएन नागरिकता देखाउँदा जमिनसमेत किन्न नपाएको समाचार हिमालयखबरले प्रकाशित गरेको थियो । यी कारणले एनआरएनए नागरिकता लिएर के गर्ने भन्ने प्रश्न उठेको छ ।

विदेशमा बस्ने नेपालीका मुद्दा कमजोर बन्दै गएका हुँदा एनआरएनए संस्था नै किन चाहियो ? भन्ने प्रश्न उठाउने बढ्दै गएका छन् ।