काठमाडौ- क्रिकेटमा बलियो टिमसंग प्रतिस्पर्धा गर्न नेपालको अनुभव अझ पुगेको रहेनछ भन्ने बुधवार नेपाल र पाकिस्तान विचको खेलले देखाएको छ ।

यो खेलमा पाकिस्तानले सहजै जित हासिल गर्यो । टस जितेर पहिलो ब्याटिगं गरेको पाकिस्तानले निर्धारित ५० ओभरमा ३४२ रनको विशाल स्कोर खडा गरेको थियो । खेलको शुरुमा नेपाली खेलाडीले पाकिस्तानी ब्याट्समेनलाई केही दवावमा राखेका थिए । झण्डै ३० ओभरसम्म त खेलमा नेपाल मजबुत नै देखिएको थियो । हेर्दा रमाइलो नै थियो । तर, त्यसपछिको ओभरमा नेपाल कमजोर देखिदैं गयो । पाकिस्तान टिमका क्याप्टेन बाबर अजामले १५१ रन वनाएर रेकर्ड राखे ।

पाकिस्तानी ब्याट्सम्यानले रन माथि रन थप्दै गए र ३४२ को विशाल स्कोर खडा गरे । यसलाई पार पाउने नेपाली टिमका लागि चुनौतीपूर्ण थियो । तर, पाकिस्तानका अनुभवी बलर अगाडी नेपाली ब्याट्सम्यान टिक्न सकेनन । १०४ रनमा नै नेपालले सवै विकेट गुमायो । नेपाली खेलाडी पुरा ओभरसम्म टिक्न पर्छ भन्दा भन्दै पनि २४ ओभर पनि छुन सकेनन् । क्याप्टेन रोहित पौडेलले खासै केही गर्न सकेनन् । उनी त खेल देखाउन नपाई आउट भए ।

पाकिस्तान अहिले एक दिने क्रिकेटको वरियतामा पहिलो नम्बरमा छ । पाकिस्तानी खेलाडीहरु अहिले फर्ममा छन् । यस्तो तुलनात्मक रुपमा क्रिकेट वरियतामा माथिल्लो श्रेणीमा रहेका टिमसंग नेपालले खेल्न सजिलो थिएन । खेल हेर्दा सबै पक्षमा नेपाली खेलाडीसंग अनुभवको कमी देखियो ।

पाकिस्तान जस्ता माथिल्लो श्रेणीमा रहेका टिमसंग खेल्न नेपालले अझ धेरै मेहिनेत गर्नु पर्ने बुधवारको खेलले देखाएको छ । उत्साह, जोश, हौसला मात्र भएर पुग्दैन अनुभव पनि हेर्न पर्छ भन्ने यो खेलले देखाएको छ । तस्बिर: सामाजिक संजाल