काठमाडौँ । गायक तथा संगीतकार दीपक बज्राचार्यले नयाँ सांगीतिक अभियान ‘प्रोजेक्ट नजिक’को घोषणा गरेका छन् । सांगीतिक प्रस्तोता र दर्शकलाई निकट ल्याउने अवधारणाअनुसार उनले यो अभियान सञ्चालनमा ल्याउन लागेका हुन् । नयाँ गीत ‘एक्लो’सँगै उनले ‘प्रोजेक्ट नजिक’ घोषणा गरेका छन् ।

हाल तयार पारिसकेका नयाँ तथा पुराना नौ गीतलाई एक–एक गरी फरक स्वादमा दर्शक तथा श्रोतामाझ ल्याउन लागेको उनले बताए । ‘हाल नौवटा गीत तयार पारेको छु, १२ वटासम्म यो प्रोजेक्टमार्फत सार्वजनिक गर्ने लक्ष्य छ,’ उनले भने, ‘यसको उद्देश्य दर्शक(श्रोता र पर्फमरलाई नजिक गराउनु हो ।’

दीपकले यो अभियान स्वदेश तथा विदेशमा सञ्चालन गर्ने तयारी गरेका छन् । जसको पहिलो प्रारुपको रुपमा नयाँ गीत ‘एक्लो’लाई लिइएको छ । गीतलाई म्युजिक भिडियोमा मात्र सीमित नगरेर सीधै दर्शकमाझ प्रस्तुत गर्ने सोचअन्तर्गत उनले ‘प्रोजेक्ट नजिक’को थालनी गरेको जानकारी दिए । रिकी शाक्यको शब्द, जेम्स प्रधानको संगीत रहेको गीत ‘एक्लो’मा दीपककै एरेन्ज छ ।

दीपकका अनुसार ‘प्रोजेक्ट नजिक’ एक डिजाइनिङ शो हो, जुन तीन भागमा विभाजन हुनेछ । पहिलो भागलाई अनप्लग लाइभ अर्थात् स्पट लाइभ इभेन्ट भनिएको छ । जसमा गीतलाई अहिलेसम्म नसुनिएको शैलीमा प्रस्तुत गरिने भएको छ । दोस्रो भागमा मीट एण्ड ग्रीट तय गरिएको छ । जसअन्तर्गत दर्शक र श्रोतालाई निकट तुल्याएर रमाइलो गर्ने र सो क्षणलाई तस्बिरमा कैद गर्ने उनको योजना छ ।

तेस्रो भाग अपबिट कन्सर्ट अर्थात् इडिएम हो । जसमा कार्यक्रमको मजा लिंदै नाच्दै, गाउँदै रमाउँदै नयाँ र पुराना गीतको प्रस्तुतिमा रमाउने सोच रहेको दीपकले बताए । ‘समग्रमा प्रस्तोता (संगीतकर्मी) र दर्शकलाई निकट ल्याउनु ‘प्रोजेक्ट नजिक’को उद्देश्य हो,’ दीपकले भने ।