अमेरिका ।  गैर आवासीय नेपाली संघ (एनआरएनए) भित्र अर्को गन्धे खेल सुरु भएको छ ।

एनआरएन अमेरिकाज क्षेत्रका तीन जना पदाधिकारीहरुको सदस्यता नवीकरण सिफारिस रोकेर वर्तमान एनआरएन अमेरिकाको कार्यसमितिले दुर्गन्धित खेलको सुरुवात गरेको छ । एनआरएन अमेरिकाज क्षेत्रका संयोजक प्रकाश सापकोटा र सहसंयोजकद्वय पुरुषोत्तम बोहोरा र पशुपति पाण्डेको सदस्यता नवीकरणको सिफारिस रोकिएको छ ।

तीनैजना विगतदेखिनै संघको आजीवन सदस्य छन् । एनआरएनको नयाँ सदस्यता नीति अनुसार आजीवन सदस्यहरुको अद्यावधिक रिपोर्ट राष्ट्रिय समितिले अन्तर्राष्ट्रिय समितिलाई पठाउनुपर्ने हुन्छ । यसरी विवरण पठाउँदा तीनजनाको नाम नियतवशः छुटाएर पठाएको पाइएको छ ।

उल्लेखित पदाधिकारीहरुमध्य पाण्डे पूर्ब कार्यसमितिका महासचिव समेत हुन् । ‘यो हदैसम्मको पूर्वाग्रही सोच हो । यसले एनआरएनप्रति अहिले जनमानसमा व्याप्त गुनासो, घृणालाई अझै मलजल गर्ने काम बुद्धि सुवेदी नेतृत्वको एनआरएनए अमेरिकाले गरेको छ’ अमेरिकाज क्षेत्रका सहसंयोजक बोहोराले भने ।

विशेषगरि एनआरएन अमेरिकाका अध्यक्ष बुद्धि सुवेदी, महासचिव अञ्जनकुमार चौलागाई र कोषाध्यक्ष राजीव श्रेष्ठले नियतवशः तीनजनाको सदस्यताको विवरण नपठाएर निहुँ खोजेको पाइएको छ । ‘यति महत्वपूर्ण विषयमा नत बैठकमा कुरा उठेको थियो, नत कुनै निर्णय भएको मेरो जानकारीमा छ’ संघका उपाध्यक्ष विकास उप्रेतीले भने ।

विगतमा सदस्यता शुल्क तिर्न आनाकानी गर्दा आइसिसीमा कारवाहीका लागि सिफारिस गरेको पूर्वाग्रह साँध्ने नियतले सदस्यता नविकरणका लागि विवरण नपठाएको तथ्य बाहिरिएको छ । एनआरएनले सधैंभरि झैझगडा र विवाद गर्ने संस्थाका रुपमा आम प्रवासी नेपाली समुदायबीच पहिचान बनाइरहेको छ । विगतमा न्यूयोर्कमा भएको झगडा, काठमाडौंमा भएको आइसिसी सम्मेलनका क्रममा देखिएको विवाद र त्यसले निम्त्याएको तीन अध्यक्षको प्रावधानले संस्थाप्रति धेरैको निराशा र व्यापक गुनासो छ । पटक पटक निम्तिने विवाद र नेपालको राजनीतिक दलका नेताहरुको इसारामा हिँड्ने कारणले गर्दा एनआरएनको सदस्यताप्रति प्रवासीहरुले खासै चासो देखाउन छाडेका छन् ।

हालैमात्र सतहमा आएको एनआरएनका तीनजना पदाधिकारीहरुको सदस्यता नियतवशः रद्ध गराउने कार्यले संस्थाप्रति एकातिर विवाद बढ्ने संकेत देखिएको छ भने अर्कातिर आइसिसीले समेत कारवाहीको डण्डा बर्षाउने संभावना बढेको छ ।

यो विषयमा प्रतिकृयाका लागि एनआरएन अमेरिकाका अध्यक्ष बुद्धि सुवेदीसँग पटक पटक फोन सम्पर्क गर्दा पनि उनले रेस्पोन्स गरेनन् । उपाध्यक्ष विकास उप्रेतीले भने यो विषयमा अाफूलाई जानकारी नभएको बताए । ‘मलाई यो विषयमा कुनै जानकारी छैन, यदी हामी पदाधिकारीलाई समेत गुमराहमा राखेर कुनै कचहरीले अवान्धित निर्णय गरेको रहेछ भने त्यो कार्य संस्थाका लागि दुर्भाग्य हुनेछ’ उनले भने । वरिष्ठ उपाध्यक्ष कृष्णजीबी पन्त र उपाध्यक्ष सुमन थापाले समेत यो घटना देखिनु दुःखद भएको उल्लेख गर्दै बैठकमा कुनै एजेण्डा समेत नभएको बताए । ‘चुनावको मुखमा आएर आजीवन सदस्यहरूको सदस्यता नवीकरण गर्न सिफारिस नहुनु दुःखद हो । यदी नियतसाथ गरिएको हो भने यसमा संलग्नहरूका लागि यो घटना भारी पर्नेछ’ दुबैले भने ।

स्रोतले उपलव्ध गराएको विवरण अनुसार संघका कोषाध्यक्ष राजीव श्रेष्ठले आइसिसीका सूचना प्रविधि प्रमुख महेश श्रेष्ठलाई पठाएको इमेलमा क्षेत्रीय संयोजक सापकोटाले विधान र संस्थाको हित विपरित कार्य गरेको आरोप लगाइएको छ । उक्त इमेलको भाषा बुझ्दा उपाध्यक्ष श्रेष्ठले सोधेको स्पष्टीकरणको जवाफ दिएको जस्तो देखिन्छ ।