अमेरिकामा बस्ने नेपाली समुदायलाई जोड्न सकिन्छ भनेर हामीले १२ वर्षअघि हिमालयखबर अनलाइन पत्रिकाको जग हालेका थियौं । समुदायका लागि सजिलो र सुलभ सूचना पुर्याउने हाम्रो यो उद्देश्य अहिले पनि कायमै छ । जसले हिमालयखबरमा गएर समाचार पढ्नुभएको छ, जसले हामीलाई सुन्नुभएको छ र हेर्नुभएको छ, यहाँहरू सबैप्रति विशेष आभार व्यक्त गर्दछौं । यस बीचमा हामीले हाम्रो वेबसाइटमा केही सुधार पनि गरेका छौं ।

सूचनाको महत्त्व सधैं रहन्छ । यो उपभोग्य वस्तु पनि हो । सही सूचनाले समुदायलाई फाइदा नै गरिरहेको हुन्छ । विदेशमा बस्दाका हाम्रा थुप्रै चुनौतीसँग सामना गरिरहेका छौं । यो परिवेशलाईआफ्नो अनुकूल बनाउँदै लैजाने दायित्व पनि तपाईं-हाम्रै हो । हामी यसमा सहयोगी हौं । हुने छौं ।

हामी अहिले १२ वर्ष पूरा गरी १३ वर्षमा प्रवेश गरेका छौं । मे ३ अर्थात् प्रेस स्वतन्त्रता दिवसकै अवसर पारेर हिमालयखबरको जग हालिएको थियो । व्यावसायिक पत्रकारिता गरेर समुुदायलाई सुसूचित बनाउनेबाहेक हाम्रो अर्को उद्देश्य छैन । हामी समुदायका सकारात्मक पक्ष उजागर गर्न चाहन्छौं । समुदायका सकारात्मक पक्षलाई अगाडि ल्याउने सम्बन्धमा हामीबीच कुनै दुविधा छैन । साथै, समुदायमा देखिएका गलत प्रवृत्तिप्रति हामी लेख्न र प्रश्न उठाउन भने छाड्ने छैनौं ।

हालै नेपाली समाजभित्र केही घटना भए । यसले समाजलाई तरङ्गित बनाएको छ । समाजमा घटेका राम्रा र नराम्रा घटनामा बहस हुनुपर्छ र यसको सम्बोधन पनि समुदायभित्रैबाट गरिनुपर्छ । यस विषयमा हिमालयखबर समुदायको साझा चौतारी पनि हो । हाम्रो भूमिकालाई समुदायबाट सहयोग र समर्थन हुन्छ भन्नेमा हाम्रो पूर्ण विश्वास छ ।

सीमित श्रोत र साधनका बाबजुद पनि हामीले पत्रकारिताको विश्वव्यापी मान्यतालाई अवलम्बन गर्दै आचारसंहिताभित्र बसेर समाचार लेखेका छौं । कार्यक्रम बनाएका छौं । समाचारका लागि पैसा माग्ने, अनावश्यक दबाब दिनेजस्ता गतिविधि हामीले कहिल्यै गरेनौं । आउने दिनमा पनि गर्ने छैनौं । तर, हाम्रा थुप्रै अप्ठ्यारा पनि छन् । यसले गर्दा हामीले चाहे जसरी काम गर्न सकेका छैनौं । सक्रिय हुन सकेका छैनौं । स्रोत जुटाउने चुनौतीसँग हामी जुधिरहेका छौं । यी यावत् चुनौतीका बाबजुद पनि हामी समुदायलाई सुसूचित बनाउने र खबरदारी गर्नेजस्ता आफ्नो दायित्वप्रति भने पछि पर्ने छैनौं । हिमालयखबरलाई नेपालमा समेत सुरु गर्ने तयारीमा हामी लागिपरेका छौं । अमेरिकामा पनि नेपाली समुदायसँगको सहयोगका केही रचनात्मक काम गर्ने योजनामा छौं ।

अन्त्यमा, हिमालयखबरका पाठक, श्रोता, विज्ञापनदाता, शुभचिन्तक अनि प्रत्यक्ष एवम् अप्रत्यक्ष रूपमा हामीलाई सहयोग र समर्थन गर्नुहुने तपाईं सम्पूर्णप्रति हामी आभारी छौं । हाम्रो आगामी यात्रामा पनि यहाँहरूको यस्तै सहयोग र समर्थन रहनेमा हामी पूर्ण विश्वस्त छौं ।