अभिनेता अनमोल केसीको प्रतिक्षित फिल्म ‘छड्के २’ को ट्रेलर सार्वजनिक भएको छ । बुधबार तीन ग्याङको लडाईको कथा भन्ने फिल्मको ट्रेलर सावजनिक गरिएको हो । रोयल मनाङ ग्याङ, बारुलाज ग्याङ र ग्रीन ग्याङको कथा ‘छड्के २’ फिल्मले प्रस्तुत गर्ने छ । यी तीनवटा ग्याङमध्ये एउटा ग्याङको नेताको रुपमा अनमोललाई प्रस्तुत गरिएको छ । जसमा उनी शरीरभरी ट्याटु र हतियार सहित बुलेट बाइक चढेर आफ्नो ग्याङको नेतृत्व गरिरहेका छन् ।

‘छड्के’ रिलिजको करिब १० वर्षपछि यसको दोस्रो श्रृंखला निर्माण भएको छ र यही फागुन १९ गतेबाट प्रदर्शन हुँदैछ । ‘भर्सन टू’मा अघिल्लो श्रृंखलाका रोविन तामाङबाहेक अरु कलाकार दोहोरिएका छैनन् । यसपटक सुपरस्टार अनमोल केसीको काँधमा फिल्म छ । र, उनी भएपछि एउटा कुरा के स्पष्ट छ भने फिल्मको इनिसियल व्यापार लरोतरो हुने छैन । त्यो तागत अनमोलको स्टारडममा छ । उनले यसअघिका फिल्मबाटै यो कुरा प्रमाणित गरिसकेका छन् ।

ग्याङस्टर जनरा निर्माणको हिसाबले चुनौतीपूर्ण मानिन्छ । बजेट पनि अन्य जनराको तुलनामा बढी हुन्छ । यसैले नेपालमा ग्याङस्टर फिल्म विरलै बन्ने गर्छन् । तर, यो जनराका दर्शक उल्लेख्य छन् ।