मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

नेपाल   

नारायणी नदीमा खतराको विन्दु पार गर्‍यो, पानीको सतह १०.२८ मिटर नाघ्यो

नारायणी नदीमा खतराको विन्दु पार गर्‍यो, पानीको सतह १०.२८ मिटर नाघ्यो

शेयर गर्नुहोस:

फन्ट परिवर्तन गर्नुहोस:

  • change font
  • change font
  • change font

चितवन । नारायणी नदीमा इतिहासमै पहिलोपटक पानीको बहावले खतराको विन्दु पार गरेको छ । जिल्ला आपत्कालीन सञ्चालन केन्द्रका अनुसार अपराह्न ४ बजेदेखि पानीको बहाव बढ्दै गएको हो ।
 
निरन्तरको वर्षाका कारण नारायणीमा पानीको बहाव राति १०ः३० बजेसम्म १०.२८ मिटर पुगेको छ । केन्द्रका अनुसार नदीमा पानीको बहाव ८ मिटरभन्दा माथि गएमा खतराको विन्दु पार गरेको मानिन्छ ।  
 
गत वर्ष साउन ६ गते बिहान नारायणीको सतह ९.९१ मिटर पुगेको थियो, जुन ४४ वर्षयताकै बढी थियो । यसअघि सन् १९७४ अगष्ट ५ मा १०.९ मिटर पानीको तह पुगेको नारायणी बेसिन फिल्ड कार्यालय भरतपुरले जनाएको छ । 
 
नारायणीसँगै राप्ती र रिउ खोलामा पानीको बहाव बढ्दै गएकाले नदी तटीय क्षेत्रका जनतालाई सुरक्षित स्थानमा गई बस्न जिल्ला प्रशासन कार्यालयले आग्रह गरेको छ । 
 
कार्यालयका प्रशासकीय अधिकृत खेमराज पौडेलद्वारा जारी सूचनामा पानीको बहाव बढेका  समयमा दाउरा टिप्न र माछा मार्न भन्दै नदीमा नपस्न अनुरोध गरिएको छ । यस्तै औषधि, खाद्यान्न र महत्त्वपूर्ण कागज झोलामा तयारी अवस्थामा राख्न पनि तटीय क्षेत्रवासीलाई आग्रह गरिएको छ ।
 
 नारायणीका कारण भरतपुर महानगरपालिका वडा नं १६, २६, २७ र २८ र राप्ती नदीबाट वडा नम्बर २२ र २३ मा बढी असर पर्ने गरेको छ । त्यस क्षेत्रमा सतर्कता अपनाउन आग्रह गरिएको छ । महानगरका वडा नं २६ र २७ का हिरापुर, सिसई, न्यूरेनीलगायत ठाउँमा नारायणी तटबन्ध पार गरी मानव बस्तीतर्फ छिर्न शुरु गरेको छ ।
 
नदीमा पानीको बहाव बढेसँगै मंगलबार प्रभावित क्षेत्रमा  महानगरपालिका प्रमुख रेनु दाहाल, प्रमुख जिल्ला अधिकारी प्रेमलाल लामिछाने र  सुरक्षा निकायका प्रमुखले अनुगमन गरेका छन् । नदी बस्तीमा पस्न सक्ने क्षेत्रको अध्ययनसमेत गरिएको छ । 
 
चितवन जिल्ला प्रशासन कार्यालयले मंगलबार साँझसम्म भरतपुर–२६ को केही भाग जमिन कटान गर्नेबाहेक अन्य भौतिक तथा मानवीय क्षति नभएको जनाएको छ । प्रशासनका सूचना अधिकारी पौडेलले भने, ‘बाढीको उच्च जोखिम छ, सबै नदी तथा खोलाहरु बढेका छन्, सुरक्षाकर्मी तैनाथ राखेको अवस्था छ, विपद् जोखिम न्यूनीकरणको टोली हाइअलर्टमा राखिएको छ ।’