काठमाडौँ । नेपालमा पछिल्लो चौबीसघन्टामा कोरोना सङ्क्रमणबाट थप १७७ जनाको मृत्यु भएको छ । यससँगै कोरोना सङ्क्रमणबाट ज्यान गुमाउनेको सङ्ख्या ६०२४ पुगेको मन्त्रालयले जनाएको छ । बिहीबार कोरोना संक्रमणबाट १९० सङ्क्रमितको मृत्यु भएको थियो ।
शुक्रबार थप ८६०७ मा कोरोना भाइरस सङ्क्रमण पुष्टि भएको छ । योसँगै सङ्क्रमितको सङ्ख्या चार लाख ९७ हजार ५२ पुगेको छ । थप २३ हजार २२६ जनाको पिसिआर परीक्षण तथा ८७३ को एन्टिजेन विधिबाट परीक्षण गरिएको थियो । पिसिआर विधिबाट ८४०७ तथा एन्टिजेनबाट २०० जनामा सङ्क्रमण पुष्टि भएको हो ।
हालसम्म पिसिआर परीक्षण गराउनेको सङ्ख्या २८ लाख ७८ हजार १४६ पुगेको छ । हाल ९१२ सङ्क्रमित क्वारेन्टिनमा रहेको स्वास्थ्य तथा जनसङ्ख्या मन्त्रालयका प्रवक्ता डा. जागेश्वर गौतमले जानकारी दिए ।
हालसम्म तीन लाख ७४ हजार ८३६ जना कोरोना मुक्त भई घर फर्किएका छन् । पछिल्लो २४ घन्टामा देशभर ७८९० सङ्क्रमित निको भएर घर फर्किएका छन् । निको हुने दर ७५.४ प्रतिशत रहेको मन्त्रालयले जनाएको छ । हाल देशभर एक लाख १६ हजार १९२ सक्रिय सङ्क्रमित छन् ।
यसैबीच, काठमाडौँ उपत्यकामा २४४७ सङ्क्रमित थपिएका छन् । जसमध्ये काठमाडौँमा १७५२, ललितपुरमा ४०० र भक्तपुरमा २९५ मा सङ्क्रमण पुष्टि भएको मन्त्रालयले जनाएको छ ।
काठमाडौँमा हाल सक्रिय सङ्क्रमितको संख्या २२ हजार १९३ पुगेको छ । काठमाडौँ उपत्यकामा कोरोनाबाट एक लाख ५० हजार १९३ निको भएका छन् भने १३६७ सङ्क्रमितको मृत्यु भएको छ । यस्तै ललितपुरमा हाल ६८५६ सक्रिय सङ्क्रमित रहेका छन् । हालसम्म २२ हजार ४३६ सङ्क्रमित निको भएका छन् भने कोरोनाबाट ३६३ सङ्क्रमितको मृत्यु भएको छ ।
यस्तै भक्तपुरमा ४८६४ सक्रिय सङ्क्रमित छन् । निको हुनेको संख्या १२ हजार ६७८ रहेको छ भने २७१ सङ्क्रमितले ज्यान गुमाएको मन्त्रालयले जनाएको छ ।
प्रतिक्रिया