काठमाडौँ । नेपालमा मंगलबार थप ९४८३ जनामा कोरोना भाइरस संक्रमण पुष्टि भएको छ । गत चौबीसघन्टामा २१ हजार ३१६ जनाको पिसिआर परीक्षणका क्रममा ९४८३ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । 

 

यस्तै, नेपालमा थप २२५ जनाको निधन भएको मन्त्रालयले जनाएको छ । यसमा नेपाली सेनाले गरेको शव व्यवस्थापनको तथ्यांकसमेत समावेश गरिएको मन्त्रालयको भनाइ छ । यसैबीच, सोमबार १३९ जनाको मृत्यु भएको थियो भने आइतबार ८८ जनाको मृत्यु भएको थियो ।  

 

नेपालमा पछिल्लो समय दोस्रो भेरियन्टको कोरोना संक्रमण व्यापक भएसँग मृत्यु हुनेको संख्या पनि निरन्तर बढ्दो क्रममा रहेको छ । नेपालमा कोरोना संक्रमणका कारण निधन हुनेको संख्या ४०८४ पुगेको छ । 

 

यसैगरी, पछिल्लो चौबीसघन्टामा ५२२५ जना संक्रमणमुक्त भएका छन् । योसहित हालसम्म ७५.५३ प्रतिशत अर्थात् ३ लाख १२ हजार १९ जना संक्रमणमुक्त रहेको मन्त्रालयले जनाएको छ । मंगलबारसम्म देशभर ९९ हजार ८ जना सक्रिय संक्रमित रहेका छन् । मन्त्रालयले दिएको जानकारीअनुसार देशभरका क्वारेन्टाइनमा ४४८ जना रहेका छन् । 

 

यसैबीच, काठमाडौँ उपत्यकामा ३९२७ जना कोरोना संक्रमित थपिएकोमा काठमाडौँका २७८८, ललितपुरका ६०२ र भक्तपुरका ५३७ जना रहेका छन् ।