सुर्खेत । गैरआवासीय नेपाली संघ एनआरएनएका अध्यक्ष राजेन्द्रकुमार शर्मा ‘आरके’ नेतृत्वको टोलीले उपप्रधान तथा रक्षामन्त्री पूर्णबहादुर खड्कासँग भेटवार्ता गरेको छ ।

जाजरकोट र रुकुम पश्चिमको भूकम्प प्रभावित क्षेत्र पुगेर राहत सामग्री वितरण गरेपछि सुखर्ते फर्किएपछि उपप्रधानमन्त्री खड्कासँग उनकै निवासमा भेटवार्ता भएको हो ।

भेटवार्तामा अध्यक्ष शर्मासहित, निवर्तमान अध्यक्ष रविना थापा, महासचिव बुद्धिसागर सुवेदी, युरोप संयोजक चिन्तामणि सापकोटा, एनआरएन अभियन्ता ओम शर्मालगाएत सहभागी थिए ।

सो अवसरमा अध्यक्ष शर्माले एनआरएनएले भूकम्प प्रभावित क्षेत्रमा वितरण गरेको राहत सामग्रीको बारेमा जानकारी गराएका थिए । यसैगरी आगामी दिनमा पनि गैरआवासीय नेपालीहरुको ज्ञान र सीपका आधारमा भूकम्प पछिको पुनःनिर्माणमा पनि आफूहरुले सरकारसँग समन्व्य गरेर काम गर्ने प्रतिबद्धता जनाए ।

जवाफमा उपप्रधानमन्त्री खड्काले विपद्को बेला सबै एकजुट भएर सहयोग गर्नुपर्ने र त्यसका लागि एनआरएनले गरेको कामको सरकारले उच्च मूल्यांकन गर्ने बताए । आगामी दिनमा पनि सरकारले एनआरएनहरुसँग मिलेर काम गर्ने बताउँदै विपद्का बेला सहयोग गर्ने विदेशमा बस्ने सबै नेपालीहरु धन्यवादका पात्र भएको पनि बताए ।

जाजरकोटको रामीडाँडा केन्द्रविन्दु भएर गत शुक्रबार गएको ६.४ रिक्टर स्केलको भूकम्पछि मानवीय र भौतिक क्षति व्यापक भएकाले अहिले राहत वितरण र उद्धारकार्य भइरहेको छ ।