ड्यालस (टेक्सस) । राष्ट्रिय स्वतन्त्र पार्टीका तत्कालिन अध्यक्ष तथा निवर्तमान उपप्रधानमन्त्री रवि लामिछानेको नागरिकता प्रकरणमा गंभीर त्रुटी भएको फैसला सर्वोच्च अदालतले गरेपछि अमेरिकामा रहेका नेपालीहरुबीच पक्ष र विपक्षमा सामाजीक सञ्जालमा कृया-प्रतिकृयाहरू आइरहेका छन् ।

अदालतको शुक्रबारको फैसलाले लामिछानेको उपप्रधानमन्त्री, सांसद, पार्टी अध्यक्ष लगायतका सबै पदहरु गएको छ । यतिखेर उनी रित्तो हातमात्र होइन नागरिकता विहिन समेत भएका छन् ।

यसै सेरोफेरोमा रविले नेचुरलाइज प्रकृयाबाट नागरिकता लिएको अमेरिकामा बस्ने नेपालीहरुबीच उनको पक्ष र उनको विपक्षमा अनेकन तर्कहरु गरिरहेका छन् । धेरैले रविले प्रकृया मिचेर, नेपालको कानुनलाई अवज्ञा गरेर अघि बढेकोले यो अवस्था आएको टिप्पणी गरेका छन् । कतिले चाँही नेपाल सतीले सरापेको मुलुक भएको उल्लेख गर्दै राम्रो काम गर्नेलाई विभिन्न तत्वहरुले रोक्ने गरेको गुनासो राखेका छन् ।

‘यायाबर’को नामबाट ट्विटरमा नियमित रुपमा आफ्ना धारणाहरु राख्दै आएका ड्यालसका भीम कार्की (सिपिए) ले रवि प्रकरणमा लेखेका छन् -‘रवि लामिछानेज्यू आयाराम गयाराम हुनुभएछ । अस्वभाविक उदयन, अकस्मात पटाक्षेप ।’

त्यस्तै दुई दशकदेखि भर्जिनियामा बसोबास गर्दै आइरहेका नेपाल अमेरिका पत्रकार संघ (नेजा) का संस्थापक अध्यक्ष गिरिश पोखरेलले पनि ट्विटरमा लेखका छन् -‘गैर आवासीय नेपाली अर्थात एनआरएन र अहिलेको रवि लामिछाने मुद्धामा के सम्बन्ध छ ? रवि अमेरिकाको पासपोर्ट लिएर नेपाल गए, नेपालमा गएर अमेरिकाको पासपोर्ट हुँदाहुँदै पुनः नेपालको पनि पासपोर्ट बनाए, नागरिकता पनि पुरानै चलाए । गैर कानुनी काम गरे ।’

पोखरेलले एनआरएन अमेरिकाले जारी गरेको विज्ञप्ती प्रति असहमति व्यक्त गर्दै सबैले कानुनको पालना गर्नुपर्ने संकेत गरेका छन् ।

नेपालमा लामो समय आर्थिक पत्रकारिता गरेका र हाल न्यू ह्याम्पसायरमा बस्दै आएका प्रभात भट्टराईले फैसला प्रति खुशी व्यक्त गरेका छन् । उनी लेख्छन्- ‘आफैले आफूलाई भगवान दावी गर्ने हाम्रो रवि कानुनभन्दा माथि छैनन् । धन्यवाद सर्वोच्च । ‘

एनआरएन अमेरिकाका पूर्ब उपाध्यक्ष रामकुमार सुवेदीले चितवनको गत निर्वाचनमा दोस्रो हुनेलाई निर्वाचित घोषणा गर्नुपर्ने तर्क फेसबुकमा राखेका छन् । उनले ‘यसो गर्नुलाई ऐन, नियम र विश्वव्यापी प्रचलन’ हुने दावी समेत गरेका छन् । चितवन क्षेत्र नम्बर २ मा कांग्रेसका उमेश श्रेष्ठ दोस्रो भएका थिए । सुवेदीले श्रेष्ठप्रति सामाजीक सञ्जालमा आफ्नो आशक्ति झल्काएका छन् ।

भर्जिनिया निवासी निदेश अधिकारीले भने ‘छिटो ५२० डलर तिरेर एनआरएन कार्ड बनाउनुस् । नत्र नेपालमा तपाईले गरेको लगानी खेर जाला’ लेखेर सचेत गराएका छन् । नेपाल सरकारले प्रदान गर्ने एनआरएन कार्ड वाहकले राजनीतिक बाहेकका सबै अधिकार प्रयोग गर्न पाउँछन् । त्यसको लागि ५२० डलर सरकारलाई तिर्नुपर्छ ।

प्रवासी मञ्च अन्तराष्ट्रिय समितिका अध्यक्ष सञ्जय थापाले रविले नेपालको कानुन मिच्न खोजेकै हुन् भनेर ठोकुवा गरेका छन् । थापाले ‘रवि जत्तिको मान्छेले नागरिकता लिने र छोड्ने प्रकृया नबुझेका होइनन होला भन्न्दै कानुन मिचेको’ कुरा फेसबुकमा लेखेका हुन् ।

अष्टिन निवासी देवराज न्यौपानेले फैसला उपर आपत्ति जनाउँदै ‘सतीले सरापेको देश । आत्मदाह हैन संघर्ष गरौं’ भनेर आव्हान गरेका छन् । न्यौपाने नेपाल कमर्स क्याम्पस मिनभवनका स्ववियूका पूर्ब सभापति पनि हुन् ।

क्यानडामा कृयाशील नेपालीमुलका पत्रकार वेनुप भट्टराईले रवि लामिछानेलाई सञ्चारकर्ममै फर्कन भन्दै नेपालटच अनलाईनमा लामो आलेख लेखेका छन् ।

न्यूयोर्क निवासी विश्व शाहले ‘सुजाता जोष्ट राजनीतिमा आउन नागरिकता त्याग्न नपर्ने’ उल्लेख गर्दै फेसबुकमा लामो टिप्पणी लेखेका छन् । उनले कानुन सबैलाई बराबर लागु हुनुपर्ने एउटालाई मात्र बलीको बोका बनाउने भन्दै आक्रोश जनाएका छन् ।

न्यूयोर्कमै कृयाशील सञ्चारकर्मी सुनिता शर्मा कोइरालाले सल्लाहयुक्त फेसबुक स्टाटस लेख्दै ‘बिदेशमा बस्ने नेपालीहरु एकै चोटी चट्टै छाडेर नेपाल नजानु । नागरिक हुने प्रकृया पुर्याएर मात्र जानुहोस् ।’

मेरिल्याण्डका निवासी रमेश भट्ट नेपाली छोरोले फेसबुकमा लेखका छन् -‘म नेपाली, हामी नेपाली भन्ने नाराका साथ नेपाली दूतावास अगाडी विरोध प्रदर्शन गरेर नेपाल सरकारलाई दवावमुलक सन्देश दिने कि ? नेपाली हुन पाउनु आफ्नो जन्म सिद्ध अधिकारका लागि आवाज उठाउने कि ?’

भर्जिनिया निवासी पत्रकार गुणराज लुईटेलले-‘सर्वोच्चको फैसलापछि एनआरएनहरुले आफ्नो सम्पत्ति विदेशतिरै लैजान थाल्नेछन् । ब्रेनड्रेनमात्र होइन वेल्थड्रेन पनि तीब्र हुने आशंका’ भन्दै फेसबुकमा स्टाटस लेखेका छन् ।

रवि अमेरिकामा रहँदा न्यूयोर्क, न्यूजर्सी, मेरिल्याण्ड लगागतका राज्यहरुमा बसेका थिए । झण्डै डेढ दशक अमेरिका बसेका उनले २०७० सालमा नेचुराइज प्रकृयाबाट अमेरिकाको नागरिकता लिएका थिए । नागरिकता लिएको चार वर्षपछि उनी नेपाल फर्किएर टिभीमा कार्यक्रम चलाउन थाले । त्यसपछि पटक पटक विवादमा तानिइरहे ।

अमेरिकामा रहेका नेपालीहरु जो रविलाई राम्रोसँग चिन्छन् र जान्दछन्, उनीहरु रविप्रति सकारात्मक देखिदैनन् । अमेरिकामा उनलाई नभोगेका, प्रत्यक्ष नदेखेकाले भने उनीप्रति ठूलो आशा र भरोसा राखेको देखिन्छ ।

शुक्रबारको सर्वोच्चको फैसलाले अमेरिकाको नागरिकता छाडेर नेपालको सार्वजनिक पदमा जान खोज्ने हो भने पुनः नागरिकताको प्रकृयामा जानुपर्ने अनिवार्यता गरेको छ ।