ड्यालस (अमेरिका) । भर्खरै मात्र अमेरिकामा एकसय आठ दिनको शान्ति पदयात्रा समापन गरेका बौद्ध भिक्षुहरुले शनिबार विशेष समारोहबीच टेक्ससको युलेसमा निर्माण हुन लागेको बौद्ध विहारको भूमिशोधन पूजा आराधना गरेका छन् ।

नेपाली सांस्कृतिक तथा आध्यात्मिक केन्द्रअन्तर्गत युलेसको रोयल पार्कवेमा निर्माण हुन लागेको बौद्ध स्तुप र विहारको भिक्षुहरुले मन्त्रोच्चारणसहित भूमिशोधन गरेका हुन् । भिक्षुहरुलाई केन्द्रले विशेष स्वागत गरेको थियो ।

कार्यक्रममा केन्द्रकी अध्यक्ष सीता सापकोटा बस्नेत, नेप्लिज बुद्धिष्ट एसोसिएसनका अध्यक्ष मकर बज्राचार्य, टेक्सस हाउसका प्रतिनिधि सलमान भोजनी, युलेस सिटी काउन्सिल मेम्बर टीका पौडेल लगायतले शुभकामना ज्ञापन गरेका थिए । सो अवसरमा भिक्षुहरुले शान्तिको लागि गरिएको पदयात्रा र त्यसको अनुभव शेयर गरेका थिए ।

केन्द्रका पदाधिकारीहरुले भिक्षुहरुलाई मन्दिर तथा विहारको भ्रमण गराउनुका साथै गतिविधिहरु, भविष्यको योजनाका बारेमा समेत जानकारी गराएका थिए ।

उक्त अवसरमा भिक्षुहरुले स्तुप र विहार निर्माणका लागि आफ्नो तर्फबाट सहयोगको घोषणा गरेका थिए । भिक्षुहरुले स्तुपा तथा विहारका लागि १० हजार डलर सहयोग दिने घोषणा गरेका छन् ।