अमेरिका । नेपालमा अमेरिकी पर्यटकको संख्या बढाउन नेपाली महावाणिज्य दूतावास न्युयोर्कले सक्रियता बढाएको छ ।

महावाणिज्य दूतावासले स्थानीय पर्यटन व्यवसायीहरुसँग शुक्रबार न्युयोर्कमा अन्तर्क्रिया कार्यक्रम गरी अमेरिकीहरुका लागि नेपाल एक उत्कृष्ट एवं आकर्षक गन्तव्य भएको दाबी गर्दै पर्यटन व्यवसायीहरुलाई आफ्नो सञ्जालमा जोड्न आग्रह गरेको छ ।

कार्यक्रममा दूतावासका महावाणिज्य दूत दधिराम भण्डारीले कार्यपत्र प्रस्तुत गर्दै हिमाल अवलोकन एवं आरोहण, कला–संस्कृति, प्राकृतिक सौन्दर्यता, ऐतिहासिक विरासत, जंगल सफारी एवं आध्यात्मिकताका लागि उत्कृष्ट गन्तव्य भएको भन्दै हरेक मौसम पर्यटकका लागि अनुकुल रहेको बताए ।

अमेरिकी पर्यटक नेपालका लागि दोस्रो ठूलो स्रोत भएको भन्दै महावाणिज्य दूत भण्डारीले अमेरिकी बजारको प्रभावले विश्व पर्यटन क्षेत्रमा प्रभाव पार्ने भन्दै त्यसका लागि सहयोग गर्न स्थानीय पर्यटन व्यवसायीहरुलाई आग्रह गरे ।

अमेरिकी पर्यटकहरुको औसत बसाइ बढी हुने र त्यसमा पनि औसत दैनिक एक सय डलर खर्च गर्ने हुनाले पनि त्यसले नेपालको पर्यटन व्यवसायमा ठूलो प्रभाव पार्ने उनको भनाइ थियो । औसतमा अन्य देशका पर्यटकहरुले बढिमा दैनिक ४० डलर खर्च गर्ने सरकारी तथ्याङ्क छ ।

नेपाली महावाणिज्य दुतावास न्यूयोर्कले नेपाल पर्यटन बोर्ड र प्यासेफिक एसिया ट्राभल एसोसिएसन (पाटा), न्युयोर्क च्याप्टरसँगको सहकार्यमा कार्यक्रम गरेको हो । कार्यक्रममा स्थानीय पर्यटन व्यवसायीहरुको सहभागिता रहेको थियो ।

कार्यक्रममा संयुक्त राष्ट्रसंघका लागि नेपाली स्थायी नियोग प्रतिनिधि एवं राजदूत लोकबहादुर थापाले पर्यटकका लागि नेपाल सुरक्षित गन्तव्य भएको भन्दै पर्यटकका लागि देशको ढोका मात्र होइन, मनको ढोका खोलेर स्वागत गर्ने बताए ।

उनले हरेक उमेर समूहका लागि उत्कृष्ट पर्यटकीय गन्तव्य भएको भन्दै त्यसका लागि आ–आफ्नो ठाउँबाट सहयोग गर्न पर्यटन व्यवसायीहरुलाई आग्रह गरे । नेपाली महावाणिज्य दूतावास न्युयोर्कले पर्यटन प्रवर्द्धनका लागि अमेरिकी पर्यटन व्यवसायीहरुसँग गरेको अन्तर्क्रिया कार्यक्रमले निकै सकारात्मक प्रभाव पारेको नेपाल सरकारका लागि न्युयोर्कका पर्यटन प्रवर्द्धक गोकुल श्रेष्ठले जानकारी दिए ।

नेपाल भ्रमणपछि नेपालका बारेमा विभिन्न अन्तर्राष्ट्रिय मिडियामा अनुभव एवं लेख प्रकाशन गरेकी लेखिका एवं कार्यक्रम निर्माता इरिन लेभीले नेपाल बयस्क महिलाहरुका लागि सुरक्षित गन्तव्य भएको भन्दै एकपटक होइन, कैयौँपटक नेपाल भ्रमण गर्दा पनि फरक अनुभूति हुने बताइन् ।

कार्यक्रममा प्यासेफिक एसिया ट्राभल एसोसिएसन, न्युयोर्क च्याप्टरले आफ्नो अनुभूति प्रस्तुत गर्दै नेपालको पर्यटन प्रवर्द्धनका लागि सक्दो प्रयास गर्ने आश्वासन दिएको थियो । त्यस्तै एसोसिएसनमा जोडिएका व्यवसायीहरुले नेटवर्क विस्तारका लागि थप पहल गर्ने बताएका थिए । त्यस्तै, नेपाल टी कलेक्टिभका संस्थापक निश्चल बास्कोटाले नेपाललाई चिया पर्यटनको उत्कृष्ट गन्तव्य बनाउन सकिने बताए ।

उनले विश्व बजारमा नेपाली चियाको माग बढिरहेका बेला चिया पर्यटनबाट उपभोक्ता र किसानबीचको सम्बन्धलाई जोड्न चिया पर्यटनले ठूलो मद्दत पु¥याउने बताए । उनले अमेरिकी पर्यटकहरु अहिले चिया पर्यटनमा निकै आकर्षित भएको भन्दै त्यसले नेपालको सिंगो पर्यटन क्षेत्रलाई नै प्रभाव पार्ने बताए ।

नेपाल पर्यटन बोर्डको तथ्याङ्कअनुसार जुन मा ९ हजार ६ सय ९६ जना अमेरिकी पर्यटकहरु नेपाल आएका थिए भने मे मा ९ हजार ७४ जना अमेरिकी पर्यटक नेपाल आएका थिए ।