किएभ । युक्रेनी विपक्षी नेताहरू पेट्रो पोरोसेन्को र युलिया टिमोसेन्कोले बिहीबार वासिङ्टन अधिकारीहरूले उनीहरूको टोलीसँग छिटो मतदान गर्नेबारे कुराकानी गरेको खबर आएपछि शान्तिकाल नआउँदासम्म चुनावमा प्रतिबन्ध लगाउने कुरालाई समर्थन गरेका छन् ।

युक्रेनले मार्सल लअन्तर्गत चुनावमा प्रतिबन्ध लगाएको छ तर रुस र अमेरिकी राष्ट्रपति डोनाल्ड ट्रम्पको टोलीले राष्ट्रपति भोलोदिमर जेलेन्स्की वैध नेता नभएको तर्क गर्दै चुनावको माग गरेका छन् ।

अमेरिकी समाचार आउटलेट पोलिटिकोले बिहीबार ट्रम्पका वरिष्ठ सहयोगीहरूले टिमोसेन्को र पोरोसेन्कोको पार्टीका वरिष्ठ सदस्यहरूसँग देशले छिटो राष्ट्रपति चुनाव गर्न सक्छ कि भन्नेबारे गोप्य छलफल गरेको जनाएको छ ।

विपक्षी युरोपेली सोलिडारिटी पार्टीका नेता तथा रोसेन कन्फेक्सनरी निर्माताका संस्थापक पोरोसेन्को सन् २०१४ मा राष्ट्रपति निर्वाचित भएका थिए र सन् २०१९ को चुनावमा जेलेन्स्कीसँग पराजित भएका थिए ।

बिहीबार एक बयानमा उनले आफ्नो टोली ‘सधैँ युद्धको समयमा चुनाव गराउने विरुद्धमा रहेको र स्पष्ट रूपमा रहेको’ बताए ।

पोरोसेन्कोले आफ्नो टोलीले ‘युक्रेनका लागि द्विदलीय समर्थन कायम राख्न सार्वजनिक र पारदर्शीरूपमा’ काम गरिरहेको बताए ।

जेलेन्स्कीको प्रशासनको आलोचना गर्दै उनले युक्रेनी सरकार र अमेरिकी प्रशासनबीच ‘सञ्चारको अभाव’ भएको र ‘यसले राज्यलाई जोखिममा पारेको’ बताए ।

गत महिना जेलेन्स्कीले बढ्दो आन्तरिक द्वन्द्वका बीच पोरोसेन्कोलाई देश छोड्न प्रतिबन्ध लगाएका थिए र उनको सम्पत्तिमा पहुँचमा रोक लगाएका थिए । एएफपी