अमेरिका । दुई डलर खर्च गरेर झण्डै खरबपति बन्न सकिन्छ । तर, यसका लागि संयोग भने मिल्नुपर्छ । अमेरिकामा क्रिसमसको समयमा खेलाइने मुख्य चिठ्ठामध्ये एक, मेगामिलियन ज्याकपटको पुरस्कार रकम एक अर्ब १५ करोड अमेरिकी डलरभन्दा माथि पुगेको छ। नेपाली रुपैयाँमा यो झन्डै साढे एक खर्बबराबर हुन्छ ।

केही दिनयता मेगामिलियन ज्याकपट कसैले जित्न नसकेकाले पुरस्कार राशि बढ्दै गएको हो । दुई डलर खर्च गरेर एउटा मेगामिलियन टिकट किन्नुभयो र त्यहाँ भएका ६ वटा नम्बरको संयोग मिल्यो भने तपाईं अत्यन्त भाग्यमानी हुनुहुनेछ । यसले तपाईंलाई विश्वकै धनी व्यक्तिहरूमध्ये एक बनाउने छ । तर, यो ज्याकपट करोडौँ सहभागीहरूमध्ये एक जनाले मात्र जित्ने सम्भावना हुन्छ ।

गएको मार्च महिनामा पनि मेगामिलियन ज्याकपट एक अर्ब डलरभन्दा माथि पुगेको थियो । न्यूजर्सीको एउटा स्टोरबाट बिक्री गरिएको मेगामिलियन टिकटले उक्त ज्याकपट जितेको थियो । विजेताले गत साता मात्र उक्त ज्याकपट दाबी गरेका छन्।

ज्याकपटको रकम एक अर्ब डलरभन्दा माथि भए पनि विजेताले सबै पैसा हातमा भने पाउँदैनन् । यसमा विभिन्न कर तिर्नुपर्छ। तर, पनि ५० करोड डलरभन्दा बढी रकम हातमा पर्छ, जुन आफैँमा निकै ठूलो रकम हो ।

ज्याकपटबाहेक अन्य विभिन्न पुरस्कारहरू पनि छन्। त्यसैले, यदि ज्याकपट नपरे पनि किनेको चिठ्ठाको नम्बर घोषणा गरिएका नम्बरहरूसँग मिलाएर हेर्नु पर्छ । सानो(माझो रकमको पुरस्कार परेको हुन सक्छ।

मेगामिलियन दुई डलरमा किन्न पाइने यो अवसर झन्डै अन्तिम हो । आउँदो वर्षदेखि यसको मूल्य ५ डलर हुनेछ । तर, ज्याकपट र अन्य पुरस्कार रकम भने बढ्नेछ । अमेरिकामा वासिङ्टन डिसीलगायत ४५ राज्यमा मेगामिलियन चिठ्ठा किन्न सकिन्छ ।